गेल्या अनेक महिन्यांपासून सुरू असलेल्या राज्यातील सत्तासंघर्षाचा गुरूवारी एकदाचा सोक्षमोक्ष लागलाच. सुप्रीम कोर्टाने निकाल जाहिर केल्यानंतर कल्याण-डोंबिवलीतील मुख्यमंत्री एकनाथ शिंदे समर्थक शिवसैनिकांनी फटाक्यांची आतषबाजी करुन, पेढे वाटून जल्लोष साजरा केला.

  बुधवारपासून सुप्रीम कोर्ट सर्वोच्च न्यायालयाच्या निकालाकडे साऱ्यांच्या नजरा लागल्या होत्या. या पार्श्वभूमीवर राज्य सरकार धोक्याच्या उंबरठ्यावर उभे असल्याची, तसेच सरकार गडगडण्याची जोरदार चर्चा सुरू होती. त्यामुळे स्थानिक पातळीवर शिंदे समर्थक शिवसैनिकांमध्ये अस्वस्थता पसरली होती. गुरूवारी दुपारी सुप्रीम कोर्टाने निकाल जाहिर केल्यानंतर अस्वस्थ शिवसैनिकांमध्ये चैतन्याचे वातावरण निर्माण झाले. राज्यातील सरकार स्थिर असल्याचे जाहीर होताच डोंबिवली शहर मध्यवर्ती शाखेत जमलेल्या शिवसैनिकांनी आनंदोत्सव साजरा केला. शहरप्रमुख राजेश मोरे, संतोष चव्हाण, गजानन व्यापारी, सुनील मालणकर, आदी पदाधिकाऱ्यांसह शिंदे समर्थक शिवसैनिक मोठ्या संख्येने उपस्थित होते. यावेळी छत्रपती शिवाजी महाराजांच्या पुतळ्याला पुष्पहार अर्पण करून मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्या विजयासह "जय भवानी जय शिवाजी, छत्रपती शिवाजी महाराज की जय, शिंदे साहेब आगे बढो, हम तुम्हारे साथ है", आदी समर्थनाच्या घोषणा देऊन शिवसैनिकांकडून परिसर दणाणून सोडण्यात आला.