डोंबिवली : ठाणे जिल्ह्यातील सर्व एकविध क्रीडा संघटनांची जगन्नाथ (आप्पा) शिंदे यांच्या नेतृत्वाखाली संयुक्त सभा रविवार ९ जून रोजी 'कल्याण केमिस्ट अँड ड्रगिस्ट असोसिएशन'च्या सभागृहात संपन्न झाली. या संयुक्त सभेला आर्चरी, एथलेटिक्स,आट्या पाट्या, बॅडमिंटन, कबड्डी, टेनिक्वाईट, वुशू, हॅन्डबाॅल, ज्युडो, फुटबॉल, बाॅक्सिंग, जिमनॅस्टिक, रोलबाॅल, कुस्तीगीर, टेनिस बॉल क्रिकेट,फेन्सिंग, साॅफ्टबाॅल, स्क्वॅश रॅकेट, रायफल शूटिंग, कॅरम, लंगडी, तायक्वांदो, स्केटिंग या एकविध क्रीडा संघटनांचे पदाधिकारी उपस्थित होते. ठाणे जिल्ह्यातील सर्व एकविध क्रीडा संघटनांनी एकत्र येवून, 'ठाणे जिल्हा एकविध क्रीडा महासंघ' हे संस्थेचे नाव निश्चित केले. महासंघाचे अध्यक्ष म्हणून जगन्नाथ (आप्पा) सखाराम शिंदे यांची सर्वानुमते निवड केली.
खेळाडू हा केंद्रबिंदू मानून ठाणे जिल्ह्यातील क्रीडा विकास होण्यासाठी प्रयत्न करणे व क्रीडांगणावरील पायाभूत सुविधा सुधारणे आवश्यक आहे, असे कल्याण तालुका ज्युडो असोसिएशन खजिनदार लिना मॅथ्यू यांनी यावेळी सांगितले. प्राविण्य प्राप्त व सहभागी खेळाडूंना ५% आरक्षण मिळावे असे मत ठाणे जिल्हा कबड्डी असोसिएशन चे सचिव मालोजी भोसले यांनी व्यक्त केले. कुस्तीगीरांना दर्जेदार मॅट महानगरपालिकांनी उपलब्ध करुन दिल्या पाहिजेत असे कल्याण-डोंबिवली परिसर कुस्तीगीर संघ सचिव सुभाष ढोणे यांनी सूचविले. ठाणे जिल्ह्यातील सर्व एकविध क्रीडा संघटना एकत्र येण्याचा इतिहास कल्याणच्या ऐतिहासिक नगरीत घडला, ही मोठी अभिमानाची गोष्ट आहे असे ठाणे जिल्हा तायक्वांदो असोसिएशन सचिव अविनाश ओंबासे यांनी सांगितले. एथलेटिक्स,हाॅकी व फुटबॉल या सारख्या खेळांना मोठ्या क्रीडांगणाची आवश्यकता आहे असे ठाणे जिल्हा ऍमॅच्युअर ॲथलेटिक असोसिएशन अशोक आहेर यांनी मांडले.
महासंघ नोंदणीकृत करण्यासाठी सर्वानुमते घटना समितीमध्ये श्रीराम पाटील - अध्यक्ष (ठाणे जिल्हा रायफल असोसिएशन), लक्ष्मण इंगळे - कार्यवाह (ठाणे जिल्हा आर्चरी असोसिएशन), प्रताप पगार - कार्यवाह (ठाणे जिल्हा रोलबाॅल असोसिएशन), मालोजी भोसले - सचिव (ठाणे जिल्हा कबड्डी असोसिएशन), लिना मॅथ्यूज - खजिनदार (कल्याण तालुका ज्युडो असोसिएशन), सुभाष ढोणे - सचिव (कल्याण-डोंबिवली परिसर कुस्तीगीर संघ), अविनाश ओंबासे - सचिव (ठाणे जिल्हा तायक्वांदो असोसिएशन) यांची निवड करण्यात आली. सभेचे सूत्रसंचालन समन्वयक या नात्याने अंकुर आहेर यांनी केले.
कोणत्याही टिप्पण्‍या नाहीत
टिप्पणी पोस्ट करा