डोंबिवली : कल्याण-शीळ रोड येथील रिजन्सी अनंतम शेजारील वन विभागाच्या असलेल्या विस्तीर्ण जागेवर खासदार डॉ. श्रीकांत एकनाथ शिंडे यांच्या हस्ते आज वृक्षारोपण करण्यात आले. कल्याण-डोंबिवली महानगरपालिकेतर्फे आयोजित करण्यात आलेल्या या वृक्षारोपण मोहिमेद्वारे तब्बल १ हजार २०० वृक्षांची लागवड करण्यात आली. ज्यामध्ये सर्व झाडे ही भारतीय प्रजातीची आहेत. यावेळी संत निरंकारी मिशनचे स्वयंसेवक, विविध सामाजिक संस्थांचे प्रतिनिधी, सामाजिक कार्यकर्ते आणि विशेष म्हणजे केडीएमसीच्या नेतीवली शाळेचे अनेक विद्यार्थीही मोठ्या संख्येने या सामाजिक उपक्रमात सहभागी झाले होते. यावेळी शालेय विद्यार्थ्यांशी संवाद साधत त्यांना वृक्षारोपणाचे महत्त्व पटवून दिले. तसेच शालेय विद्यार्थ्यांना रोपांचे वाटप देखील केले.
यावेळी शिवसेनेचे जिल्हाप्रमुख गोपाळ लांडगे, उपजिल्हाप्रमुख राजेश कदम, डोंबिवली शहरप्रमुख राजेश मोरे, कल्याण ग्रामीणचे महेश पाटील, युवासेना सचिव दीपेश म्हात्रे, गुलाब वझे, विश्वनाथ राणे, सागर जेधे, कविता गावंड यांच्यासह केडीएमसीचे अधीक्षक संजय जाधव, अतिरिक्त आयुक्त हर्षल गायकवाड, रोहिणी लोकरे, रीजन्सी ग्रुपचे महेश अग्रवाल यांच्यासह अनेक मान्यवर तसेच कार्यकर्ते मोठ्या संख्येने उपस्थित होते.