अल्पवयीन मुलीसोबत शारीरिक संबंध ठेवून नवजात अर्भकास कचऱ्यात टाकणाऱ्या आरोपीला अटक..

प्रतिनिधी: अवधुत सावंत

डोंबिवली : कल्याण पश्चिम येथील खडकपाडा पोलीस ठाण्याच्या हद्दीत बारावे भागात एक स्त्री जातीचे अर्भक बेवारस टाकले गेले होते. अत्यंत हृदयद्रावक व माणुसकीला काळीमा फासणारी धक्कादायक अशी घटना उघडकीस आली आहे. गुन्ह्यातील एका १९ वर्षीय युवकाला खडकपाडा पोलीसांनी अटक केली असून १७ ऑगस्ट २०२५ रोजी गुन्हा नोंदवण्यात आला असून गु.र.नं. ६७०/२०२५ भारतीय न्याय संहिता कलम ६४(२),(एम),९३,३(५), बाल न्याय (मुलाची काळजी व संरक्षण) कायदा २०१५ चे कलम ७५ आणि बालकांचे लैंगिक अत्याचारापासून संरक्षण अधिनियम (POCSO) २०१२ अंतर्गत कलम ४,८,१२ अंतर्गत आरोपीवर गुन्हा दाखल करण्यात आला आहे.

सदर गुन्ह्याच्या तपासानुसार आरोपी रोहित प्रदीप पांडे (वय: १९ वर्षे) राहणार: बारावे, त्याने अल्पवयीन असल्याचे माहित असूनही पीडित मुलीसोबत मागील दोन वर्षापासून शारीरिक संबंध ठेवले, त्यात ती गर्भवती राहिली. सदर मुलीने नवजात मुलीला जन्म दिला. अर्भकाचा जन्मानंतर कोणताही पुरावा मागे न ठेवता, ते अर्भक रात्रभरात कचऱ्याच्या ढिगाऱ्यात टाकून दिले, ज्यामुळे बाळाचा जीव धोक्यात आला. कल्याण, आंबिवली व शहाड परिसरात तांत्रिक विश्लेषण आणि प्रत्यक्ष तपासणीद्वारे पीडित व आरोपीचा शोध घेण्यात आला. त्यानंतर त्यांना वैद्यकीय तपासणीसाठी रुग्णालयात दाखल करण्यात आले. 

पुढील तपासा दरम्यान आरोपी रोहित पांडे यांस १९ ऑगस्ट रोजी अटक करण्यात आली. या प्रकरणाचा तपास अप्पर पोलीस आयुक्त पूर्व प्रादेशिक विभाग कल्याण संजय जाधव यांच्या मार्गदर्शनाखाली पोलीस उपायुक्त परिमंडळ-३ अतुल झेंडे, सहाय्यक पोलीस आयुक्त कल्याण विभाग कल्याणजी घेटे, तसेच खडकपाडा पोलीस ठाणे चे वरिष्ठ पोलीस निरीक्षक डॉ. अमरनाथ वाघमोडे, निरीक्षक (गुन्हे) मारुती आंधळे, पोलीस निरीक्षक विजय गायकवाड, सतीश पाटील, उपनिरीक्षक भूषण देवरे, व तपास पथकाच्या इतर अंमलदारांनी केला. ही घटना केवळ कायद्याचा भंग करणारी नसून सामाजिक दृष्टिकोनातूनही अत्यंत चिंताजनक आहे. संबंधित आरोपीवर कायद्यानुसार कठोर कारवाई होण्याची शक्यता आहे.

संसदेचा स्फोटक निर्णय! Dream11, MPL, PokerBaazi ऑनलाईन गेम रातोरात होणार बंद ?

प्रतिनिधी: अवधुत सावंत

नवी दिल्ली : ऑनलाईन गेमिंगवर सरकारचा मोठा निर्णय! The Promotion and Regulation of Online Gaming Bill, 2025 गुरुवारी राज्यसभेत पारित झाला असून आता तो राष्ट्रपती द्रौपदी मुर्मू यांच्या स्वाक्षरीसाठी गेला आहे. हा कायदा लागू झाल्यानंतर पैशांवर आधारित सर्व गेम्स म्हणजेच Real Money Games (RMGs) देशात पूर्णपणे बंद होणार आहेत.

- ७२ तासांत दोन्ही सभागृहांतून मंजुरी – विधेयकाला मंत्रिमंडळ, लोकसभा आणि राज्यसभेची झपाट्याने मंजुरी मिळाली.

- मोठ्या कंपन्यांना धक्का – Dream11, MPL, PokerBaazi सारख्या कंपन्यांचा प्रमुख महसूल रातोरात कोसळणार.

- सरकारचा ठाम पवित्रा – “ऑनलाइन पैशांच्या गेममुळे अनेक कुटुंबांचं नुकसान झालं आहे. समाजातल्या गैरप्रकारांवर लगाम घालणं हीच संसद व सरकारची जबाबदारी आहे,” असं आयटी मंत्री अश्विनी वैष्णव यांनी राज्यसभेत स्पष्ट केलं.

- विरोधकांचा गोंधळ – काही विरोधी खासदारांनी विधेयक बदलण्याचे प्रस्ताव मांडले, मात्र मुख्य भर हा “मत चोरीच्या आरोपांवर”च होता.- 

त्वरित अंमलबजावणी 

मंत्री वैष्णव यांनी सांगितलं की, हा कायदा त्वरित लागू केला जाणार असून त्यासाठी स्वतंत्र नियमावली किंवा दीर्घकालीन सल्लामसलत होणार नाही.

- उद्योगात खळबळ – उद्योग क्षेत्राने गृहमंत्री अमित शहा यांना पत्र लिहून सवलतीची मागणी केली आहे. मात्र सरकारने ई-स्पोर्ट्सला प्रोत्साहन देण्याची घोषणा केली आहे.

गेम खेळा, पण पैशांचा मोह केला तर थेट तुरुंगाची हवा खावी लागेल !

या निर्णयामुळे शेअर बाजारावरही परिणाम दिसून आला. PokerBaazi मध्ये गुंतवणूक केलेल्या Nazara Technologies च्या शेअर्समध्ये २% घसरण झाली असून Delta Corp Ltd. च्या शेअर्समध्ये ३.१४% घट नोंदली गेली.

उपमुख्यमंत्री एकनाथ शिंदेंनी जाहीर केले ‘लाडकी सून’ अभियान..

प्रतिनिधी: अवधुत सावंत

   

ठाणे, दि. १८ : ‘लाडकी बहीण’ योजनेच्या यशानंतर आता महाराष्ट्राचे उपमुख्यमंत्री एकनाथ शिंदे यांनी महिलांसाठी आणखी एक महत्त्वाचे पाऊल उचलले आहे. त्यांनी ठाणे शहरातून ‘लाडकी सून’ या राज्यव्यापी अभियानाची त्यांनी सुरुवात केली आहे. या अभियानाचा मुख्य उद्देश घरगुती अत्याचार आणि अन्यायाला बळी पडणाऱ्या महिलांना तात्काळ मदत करणे हा आहे. या अभियानांतर्गत पीडित सुनांना मदत करण्यासाठी एक हेल्पलाइन नंबर जारी करण्यात आला आहे. ८८२८८६२२८८ या नंबरवर पीडित महिला थेट संपर्क साधून मदत मागू शकतात. त्यांनी दिलेली माहिती पूर्णपणे गोपनीय ठेवली जाईल. हे अभियान संपूर्ण महाराष्ट्रात राबवले जाणार असून, प्रत्येक शिवसेना (शिंदे गट) शाखेतून पीडित महिलांना मदत आणि मार्गदर्शन केले जाईल. एकनाथ शिंदे यांनी यावेळी बोलताना सांगितले की, “सासर काही वाईट नसते, पण काही ठिकाणी अप्रिय घटना घडत असतात. आपली मुलगी जशी लाडकी असते, त्याचप्रमाणे सूनही लाडकी असावी, यासाठी आम्ही हे अभियान सुरू केले आहे.”

हे अभियान विशेषतः सून आणि सासू यांच्यातील संबंध सुधारण्यासाठी आणि प्रत्येक सुनेला घरात सन्मान मिळावा यासाठी सुरू करण्यात आले आहे. उपमुख्यमंत्री एकनाथ शिंदे यांच्या पत्नी आणि माजी महापौर मीनाक्षी शिंदे यांच्या पुढाकाराने या अभियानाची जबाबदारी त्यांच्यावर सोपवण्यात आली आहे. शिंदे यांनी एक्सवर (ट्विटर) माहिती दिली की, आपल्या घरात जशी आपली लेक लाडकी असते तशीच सूनही लाडकी असायला हवी. तिला योग्य वागणूक देऊन सन्मानाने वागवायला हवे, आणि जे असे करणार नाहीत त्यांना आता शिवसेना महिला आघाडी योग्य पद्धतीने धडा शिकवणार आहे. त्यासाठी ‘लाडक्या सुनेचे रक्षण हेच शिवसेनेचे वचन’ हे अभियान हाती घेणार आहे. महिला कुटुंबासाठी सर्व काही करतात, पण स्वतःच्या तब्येतीकडे दुर्लक्ष करतात. त्यामुळे आपली नियमित तपासणी करून घेण्यासाठी ठाणे मनपा आणि रोटरी क्लबच्या पुढाकाराने ‘उपमुख्यमंत्री निरोगी महिला अभियान’ सुरू करण्यात आले असून जास्तीत जास्त महिलांनी त्यांचा लाभ घ्यावा असे आवाहन देखील शिंदे यांनी केले

मुख्यमंत्री देवेंद्र फडणवीस यांचे अतिवृष्टीच्या पार्श्वभूमीवर प्रशासनाला सतर्कतेचे निर्देश..

प्रतिनिधी: अवधुत सावंत

   

मुंबई, दि. १८ : मुख्यमंत्री देवेंद्र फडणवीस यांनी आज मंत्रालयातील राज्य आपत्ती व्यवस्थापन कक्षात संपूर्ण राज्यातील पावसाच्या स्थितीचा आढावा घेतला. यावेळी आपत्ती व्यवस्थापन मंत्री गिरीश महाजन, माहिती तंत्रज्ञान मंत्री ऍड. आशिष शेलार, मुख्य सचिव राजेशकुमार, जलसंपदा विभागाचे अपर मुख्य सचिव दीपक कपूर, आपत्ती व्यवस्थापन अपर मुख्य सचिव सोनिया सेठी, कृषी विभागाचे प्रधान सचिव विकासचंद्र रस्तोगी, सार्वजनिक बांधकाम विभागाचे सचिव संजय दशपुते तसेच वरिष्ठ अधिकारी उपस्थित होते. यावेळी सर्व विभागीय आयुक्त, जिल्हाधिकारी दूरदृश्य संवाद प्रणालीद्वारे बैठकीत सहभागी झाले.

बैठकीत विभागीय आयुक्तांनी आपल्या विभागातील पावसाबाबतची माहिती सादर केली. रत्नागिरी, रायगड आणि हिंगोली जिल्ह्यांत अधिक पाऊस झाला असून, हवामान खात्याने १७ ते २१ ऑगस्टदरम्यान अतिवृष्टीचा इशारा दिला आहे. त्यामुळे पुढील काही दिवस सतर्क राहण्याचे आदेश मुख्यमंत्र्यांनी दिले. मागील दोन दिवसांत राज्यात विविध घटनांमध्ये सात जणांचा मृत्यू झाला आहे. कोकणातील काही नद्यांनी धोकापातळी ओलांडली असून जळगावमध्ये मोठे नुकसान झाले आहे. अलमट्टीबाबत कर्नाटक सरकारशी सातत्याने संपर्क ठेवला जात असून, सद्या धोका नसला तरी यंत्रणा सतर्क ठेवण्याचे आदेश मुख्यमंत्री यांनी दिले. मुखेडमधील परिस्थिती नियंत्रणात आली असून, विष्णुपुरीकडे विशेष लक्ष देण्याचे निर्देश देण्यात आले आहेत.

छत्रपती संभाजीनगर विभागातील ८०० गावे बाधित झाली आहेत. दक्षिण गडचिरोलीत प्रशासन सतर्क आहे. अकोला, चांदूर रेल्वे, मेहकर, वाशिम येथे परिस्थिती पूर्वपदावर येत आहे. विदर्भात प्राथमिक अंदाजानुसार २ लाख हेक्टर क्षेत्रावर पिकांचे नुकसान झाले आहे. मुंबईत आज सकाळपासून अवघ्या आठ तासांत १७० मिमी पाऊस झाला आहे. शहरात पाणी तुंबल्यामुळे दोन ठिकाणी वाहतूक प्रभावित झाली. रेल्वे, मेट्रो व इतर वाहतूक सुरळीत सुरू आहे. पुढील १० ते १२ तास मुंबईसाठी अत्यंत महत्वाचे असून, प्रशासनाने काळजी घेण्याचे आदेश मुख्यमंत्र्यांनी दिले आहेत. उद्याच्या हवामानाचा अंदाज लक्षात घेऊन शाळांना सुटी जाहीर करण्याचा अधिकार स्थानिक प्रशासन व महापालिकांना देण्यात आला आहे.

मुख्यमंत्र्यांनी नागरिकांना दिलेल्या सूचनांमध्ये, एसएमएस अलर्ट पाठवताना वेळेचा अचूक उल्लेख करावा, येणारे अलर्ट गांभीर्याने घ्यावेत, स्वतःची काळजी घ्यावी, असे आवाहन करण्यात आले. तातडीच्या मदतीसाठी मंत्रालय गाठण्याची गरज नाही, स्थानिक पातळीवरच निधी व अधिकार देण्यात आले आहेत, असे त्यांनी स्पष्ट केले. घरांच्या पडझडीसाठीची मदत, पंचनामे योग्य पद्धतीने करण्याचे निर्देशही देण्यात आले. धोक्याची पातळी वाढण्यापूर्वी अन्य राज्यांशी संपर्क साधण्यास सांगण्यात आले. पर्यटकांच्या ठिकाणी पोलिसांनी सतर्क रहावे, दरडी कोसळणाऱ्या भागात आधीच यंत्रणा कार्यरत करावी, तसेच निवारा केंद्रात भोजन, शुद्ध पाणी व पांघरूण यांची पुरेशी सोय करावी, असे आदेश मुख्यमंत्री फडणवीस यांनी दिले.

मुंबईसह ठाणे, पालघर जिल्ह्यातील शाळांना आज सुट्टी..

प्रतिनिधी: अवधुत सावंत

   

मुंबई दि. १८ :  मुसळधार पावसाचा अंदाज वर्तवण्यात आल्यानंतर रेड अलर्ट देण्यात आलेल्या मुंबईसह ठाणे, पालघर, रायगड , नाशिक जिल्ह्यातील घाटमाथा, बुलडाणा जिल्ह्यातील दोन तालुक्यातील सर्व शाळा, महाविद्यालये यांना आज, दिनांक १९ ऑगस्ट २०२५ रोजी सुट्टी जाहीर करण्यात आली आहे.

भारतीय हवामान खात्याकडून मंगळवार, दिनांक १९ ऑगस्ट २०२५ रोजी मुंबई सह या सगळ्या जिल्ह्यात अतिमुसळधार पावसाचा इशारा (रेड अलर्ट) देण्यात आला आहे. या पार्श्वभूमीवर, मुंबई महानगरसह या सर्व जिल्ह्यांमध्ये सर्व शासकीय, खासगी, महानगरपालिका शाळा आणि महाविद्यालये यांना जिल्हा आपत्ती व्यवस्थापन प्राधिकरण या नात्याने सुट्टी जारी करण्यात आली आहे. या शिवाय स्थानिक पातळीवर परिस्थिती पाहून संबंधित जिल्हाधिकारी, शाळा मुख्याध्यापक यांना शाळांना सुट्टी देण्याचे अधिकार देण्यात आल्याचे शालेय शिक्षण मंत्री दादा भुसे यांनी प्रसिद्धी माध्यमांसमोर स्पष्ट केले आहे.

'जे एम एफ' शिक्षण संस्थेमध्ये ७९ वा स्वातंत्र्य दिन आणि कृष्ण जन्माष्टमी उत्साहात साजरी..

प्रतिनिधी: अवधुत सावंत

डोंबिवली:  भारत देश १९४७ साली स्वतंत्र झाला आणि भारतीय नागरिकांना त्यांचे मूलभूत हक्क आणि अधिकार मिळाले त्याच मातृभूमीसाठी आणि आपल्या शूरवीर शाहिद जवानांना कृतज्ञता व्यक्त करण्याचा दिवस म्हणजे १५ ऑगस्ट. योगायोग हाच की गोकुळ अष्टमी देखील याच दिवशी असल्याकारणाने मोठ्या जल्लोषात उत्सवचं साजरा करण्यात आला.

'जे एम एफ' संस्थे अंतर्गत जन गण मन इंग्रजी माध्यमिक शाळा आणि विद्यामंदिर तसेच कनिष्ठ महाविद्यालय व वंदे मातरम् पदवी महाविद्यालयाच्या प्रांगणात झेंडा वंदन करण्यात आले. संस्थेचे संस्थापक अध्यक्ष डॉ. राजकुमार कोल्हे, संस्थापिका सचिव डॉ. प्रेरणा कोल्हे, खजिनदार जान्हवी कोल्हे, प्रमुख पाहुणे डॉ. गुजराथी तसेच इतर पदाधिकारी व सर्व विद्यार्थी, शिक्षक, पालक यांनी शाळेच्या प्रांगणात ध्वजारोहण करून तिरंग्याला मानवंदना दिली त्यावेळी संगीत शिक्षिका सौ. श्रेया कुलकर्णी यांच्या मार्गदर्शनाखाली इयत्ता तिसरी व चौथीच्या विद्यार्थ्यांनी राष्ट्रगान व झेंडावंदन गीत गाऊन सलामी दिली. इयत्ता नववी व दहावीच्या विद्यार्थ्यांनी कार्यक्रमाचे सूत्रसंचालन केले. मान्यवरांच्या हस्ते भारत मातेच्या प्रतिमेची व श्रीकृष्णाच्या मूर्तीचे पूजन करण्यात आले व सांस्कृतिक कार्यक्रमांना सुरुवात करण्यात आली. इयत्ता दुसरीच्या विद्यार्थ्यांनी देशभक्तीपर गीत सादर करून उपस्थितांची मने जिंकली. त्याच बरोबर नृत्य शिक्षक अभिषेक देसाई यांच्या मार्गदर्शनाखाली देशभक्तीपर नृत्य तर शिक्षिका कविता गुप्ता व नितेश मेस्त्री यांच्या मार्गदर्शनाखाली देशभक्तीपर नाटक सादर केले. तर महाविद्यालयीन विद्यार्थ्यांनी देखील भाषण व नृत्य सादर केले.

१५ ऑगस्ट १९४७ रोजी भारत देशाला स्वातंत्र्य मिळाले आणि भारतीय एकात्मता हीच भारताचा अमूल्य ठेवा म्हणून भारत देशाची ओळख निर्माण झाली, "भारत माझा देश आहे आणि सारे भारतीय माझे बांधव आहेत." ही वचनबद्ध प्रतिज्ञा प्रत्येक भारतीयांच्या मनात, हृदयात कृतज्ञता पूर्वक एकात्मतेचे प्रतीक बनून राहिली आहे, असे संस्थेचे संस्थापक अध्यक्ष डॉ. राजकुमार कोल्हे यांनी आपल्या भाषणात सांगितले. तर देशाच्या सीमेवर जाऊन लढले म्हणजेच देशसेवा केली असे नाही तर कुठेही कचरा न टाकता स्वच्छ भारत, सुंदर भारत करणे ही सुद्धा देशाचीच सेवा आहे असे संस्थापिका सचिव डॉ. प्रेरणा कोल्हे यांनी सांगितले. यावेळी १९४७ सालापासून ते २०२५ पर्यंतच्या काळात देशात कोणकोणत्या अलौकिक घटना घडल्या त्या घटना क्रमांकाची चित्रफित दाखवण्यात आली. पुस्तकी इतिहासाच्या अभ्यासाबरोबरच त्या काळी घडत असलेल्या घटना विद्यार्थ्यांना बघून समजावा असा इतिहास दाखवण्यात आला, संस्थापक डॉ. राजकुमार कोल्हे यांनी प्रत्येक घटनेचे सविस्तर वर्णन करून विद्यार्थ्यांना समजावून सांगितले. प्रसार माध्यमाचे मुख्य संपादक रोहित राजगुरु, अखिल नायडू व त्यांच्या चमू ने चित्रफित तयार केली.

स्वातंत्र्य दिनाचा कार्यक्रम झाल्यावर लगेचच बाळगोपाल्यांच्या आवडीचा कृष्ण जन्माष्टमी सोहळा व दहीहंडी उत्सव साजरा करण्यात आला. इयत्ता पहिली दुसरीच्या विद्यार्थ्यांनी कृष्णाचे सुंदर गीत गाऊन भक्तीमय वातावरण तयार केले तर नाट्य शिक्षक श्री. प्रमोद पगारे यांच्या मार्गदर्शनाखाली विद्यार्थ्यांनी राधा कृष्ण नाटक सादर केले व इतर विद्यार्थ्यांनी रासलीला नृत्य सादर केले. "लाख असतील कृष्ण कालिंदीच्या तटाला, राधेस जो मिळाला तो एकटाच उरला.." सचिव डॉ. प्रेरणा कोल्हे यांनी सुंदर अशा पंक्ती म्हणून आपल्या कृष्ण कथेला सुरुवात केली. स्वातंत्र्य दिन आणि कृष्ण जन्म हा एकाच दिवशी आला हा योगायोग आहेच खरे, पण या दोन्ही गोष्टीत एकच साम्य आहे ते म्हणजे, दोन्हीकडे असणारे 'तुरुंग ' बराच काही इतिहास सांगून जातो, ज्यादिवशी स्वातंत्र्य मिळालं तेव्हा देशासाठी तुरुंगात असलेले वीर बाहेर पडले व स्वतंत्र झाले तर श्रीकृष्णाचा जन्म तुरुंगात झाला आणि तोही कंसाच्या तावडीतून वाचण्यासाठी तुरुंगातून बाहेर पडला.. असा इतिहास म्हणजे कर्मासाठी आणि धर्मासाठी असलेला दैवी दुवा आहे असेही डॉ. प्रेरणा कोल्हे यांनी नमूद केले. कृष्ण कोण होता आणि त्याच्या लीला कशा होत्या याची माहिती त्यांनी आपल्या चित्रफिती मध्ये दाखवली.

मधुबन वातानुकुलीत दालनामध्ये मोठी दहीहंडी बांधून बाळकृष्ण बनून आलेल्या छोट्या मुलांचे थरावर थर तयार करून जल्लोषात दहीहंडी फोडण्यात आली. प्रसाद वाटप होऊन सर्वांनी कार्यक्रमाचा आनंद घेतला. कार्यक्रमाचे सूत्र संचालन प्राध्यापक श्री. योगेश शिरसाट व विद्यामंदिर शाळेची विद्यार्थिनी मीरा यांनी केले.

नितीन गडकरी यांना लोकमान्य टिळक राष्ट्रीय पुरस्कार प्रदान..

प्रतिनिधी: अवधुत सावंत

   

पुणे, दि.०१– आज पुण्यातील टिळक स्मारक मंदिर येथे केंद्रीय मंत्री नितीन गडकरी यांना लोकमान्य टिळक राष्ट्रीय पुरस्कार २०२५ चे राज्याचे मुख्यमंत्री देवेंद्र फडणवीस उपमुख्यमंत्री अजित पवार आणि एकनाथ शिंदे यांच्या हस्ते प्रदान करण्यात आला. यावेळी रोहित टिळक, सुशील कुमार शिंदे, मंत्री चंद्रकांत पाटील आदी मान्यवर उपस्थित होते.

१९८३ साली लोकमान्य टिळक राष्ट्रीय पुरस्काराची सुरुवात झाली. सर्व प्रथम एस.एम.जोशी यांना टिळक पुरस्कार पुरस्कार देण्यात आला. पुरस्काराचे हे ४३ वे वर्ष आहे. दोन वर्षांपूर्वी देशाचे पंतप्रधान नरेंद्र मोदी यांना लोकमान्य टिळक राष्ट्रीय पुरस्कार देण्यात आला होता मागील वर्षी हा पुरस्कार सुधा मूर्ती यांना देण्यात आला.

लोकमान्य टिळक हे आमच्यासाठी प्रेरणा स्थान आहे. त्यांच्या नावाने असणारा पुरस्कार मला मिळाला मी भाग्यवान आहे, टिळक हे राष्ट्रीय निर्माते होते. सत्ता कारणाचे रूपांतर हे समाज कार्यात झाले पाहिजे. स्वातंत्र्य हे राष्ट्रपुरुषांच्या बलिदानाने मिळाले आहे. अविचारी माणसे धाडसी निर्णय घेतात असे नितीन गडकरी आपल्या सत्काराच्या उत्तरात म्हणाले.

५० हजार कोटींची पुणे शहरात काम होणार आहेत. मुंबई-बंगलोरचे काम लवकरच होणार आहे. स्वराज्य आणि समाज सुधारणा देखील पाहिजे. महाराष्ट्र सर्वात जास्त रेव्हेन्यू देत आहे. भारत आता ३ नंबर ची अर्थव्यवस्था आहे. आत्मनिर्भर भारत चे स्वप्न आपले पूर्ण होणार आहे. आटोमोबाईल मध्ये भारत येणाऱ्या काळात सर्वात मोठा देश होणार आहे. लोकमान्यांचे स्वराज्याचे सुराज्य बनवण्याचे काम आपण केले पाहिजे, असे ही गडकरी म्हणाले. टिळकांचे स्वप्न पूर्ण करण्याचे काम आपण केले पाहिजे असे नितीन गडकरी म्हणाले.

कोल्हापुरी चप्पल जीआय टॅगचे अधिकृत स्वामित्व महामंडळाकडेच..

प्रतिनिधी: अवधुत सावंत

   

मुंबई, दि. ०१ :– कोल्हापुरी चप्पल या महाराष्ट्र-कर्नाटकातील पारंपरिक आणि ऐतिहासिक पादत्राणास 'जीआय टॅग' प्राप्त आहे. या जीआय टॅगचे अधिकृत नोंदणीकृत 'स्वामित्व संत रोहिदास लेदर इंडस्ट्रीज अ‍ॅण्ड चर्मकार डेव्हलपमेंट कॉर्पोरेशन लिमिटेड' (एलआयडीसीओएम) आणि 'डॉ. बाबू जगजीवनराम लेदर इंडस्ट्रीज डेव्हलपमेंट कॉर्पोरेशन लिमिटेड' (एलआयडीकेएआर) या दोन महामंडळाकडेच असल्याचे दोन्ही महामंडळाच्या व्यवस्थापकीय संचालक यांनी स्पष्ट केले आहे.

जून २०२५ मध्ये, इटलीच्या प्रसिद्ध ‘प्राडा’ ब्रँडने पुरुषांसाठी आपले ‘स्प्रिंग/समर’ कलेक्शन सादर केले. या फॅशन शोमध्ये मॉडेलने परिधान केलेल्या लेदर सँडल्सचे डिझाइन महाराष्ट्रातील पारंपरिक आणि जीआय नोंदणीकृत कोल्हापुरी चप्पलप्रमाणे अत्यंत साम्य दर्शवणारे असल्याचे निदर्शनास आले. या घटनेनंतर सामाज माध्यमांवर व पारंपरिक कारागीर समूहांतून तीव्र प्रतिक्रिया उमटल्या. त्यानंतर वकिलांच्या एका गटाने भौगोलिक संकेतचिन्ह (जिआयगी टॅग) ने संरक्षित असलेल्या कोल्हापुरी चपलेसारखं डिझाइन वापरून कायद्याचं उल्लंघन केल्याबद्दल प्राडाला आव्हान देणारी एक जनहित याचिका (पिआयएल) मुंबई उच्च न्यायालयात दाखल केली. १६ जुलै २०२५ रोजी खंडपीठाने ही जनहित याचिका फेटाळून लावतांना असा निर्णय दिला की, अशा बाबींसाठी फक्त कोल्हापुरी चपलेच्या भौगोलिक संकेतचिन्हाचे नोंदणीकृत धारक म्हणजेच 'महाराष्ट्र आणि कर्नाटक चर्मोद्योग विकास महामंडळे' ही यातील प्रत्यक्ष भागधारक असल्याने, त्यांनाच अशा प्रकारची दिवाणी कारवाई करण्याचा कायदेशीर अधिकार आहे.

या पार्श्वभूमीवर, लिडकॉम आणि लिडकर या महामंडळाने कोल्हापुरी ग्लोबल जीआय टॅगचे अधिकृत नोंदणीकृत मालक असून त्यांनी संयुक्तपणे आपली भूमिका स्पष्ट केली आहे की, प्राडा किंवा तत्सम आंतरराष्ट्रीय संस्थांशी कोणत्याही प्रकारचे संवाद, चर्चा किंवा प्रतिनिधित्व करण्याचा अधिकार इतर कोणत्याही व्यक्ती अथवा संस्थेला नाही.

कोल्हापुरी चप्पलांचा इतिहास हा १२ व्या शतकातील संत परंपरेपासून ते २० व्या शतकातील राजर्षी शाहू महाराजांच्या प्रगतिकारक धोरणांशी निगडित आहे. 'लिडकॉम' आणि 'लिडकर' यांचा एकत्रित उद्देश केवळ भौगोलिक संकेताचे संरक्षण करणे नसून, हजारो स्थानिक चर्मकार कारागीरांच्या हक्कांचे रक्षण करणे आणि या परंपरेचा राष्ट्रीय व आंतरराष्ट्रीय स्तरावर ठामपणे ठसा उमटवणे आहे, असे व्यवस्थापकीय संचालक लिडकॉम प्रेरणा देशभ्रतार व व्यवस्थापकीय संचालक लिडकर के.एम. वसुंधरा यांनी प्रसिद्धी पत्रकात स्पष्ट केले आहे.

गोकुळाष्टमी निमित्त राज्यातील १.५० लाख गोविंदांना राज्य सरकार तर्फे विमा संरक्षण कवच..

प्रतिनिधी: अवधुत सावंत

   

मुंबई, दि. ०१:– गोकुळाष्टमी अर्थात दहिहंडी हा महाराष्ट्राच्या संस्कृतीचा अत्यंत महत्त्वाचा सण असून या उत्सवात राज्यातील हजारात युवक-युवती “गोविंदा” म्हणून थरावर थर रचत हंडी फोडण्यासाठी सहभागी होतात. मात्र गेल्या काही वर्षांत सरावादरम्यान आणि प्रत्यक्ष उत्सवाच्या दिवशी अनेक अपघात घडले असून, अनेक गोविंदांना दुखापतींचा सामना करावा लागतो.

गोविंदांच्या सुरक्षिततेसाठी आणि त्यांच्या आरोग्याच्या दृष्टीने विमा संरक्षण मिळावे म्हणून परिवहन मंत्री प्रताप सरनाईक आणि युवासेना कार्याध्यक्ष पुर्वेश सरनाईक यांनी राज्याचे उपमुख्यमंत्री एकनाथ शिंदे यांच्याकडे मागणी केली होती. या मागणीला सकारात्मक प्रतिसाद देत यंदा राज्यातील सुमारे १.५० लाख गोविंदांना “गोविंदा समन्वय समिती (महाराष्ट्र)” या नियोजन समितीच्या माध्यमातून “ओरिएंटल इन्शुरन्स कंपनी” चे विमा संरक्षण देण्यात येणार आहे. युवासेना कार्याध्यक्ष पुर्वेश सरनाईक यांनी सांगितले की, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांनी गोविंदांसाठी आवश्यक असलेली विमा कवच योजना तातडीने मंजूर करून दिल्याबद्दल राज्यभरातील लाखो गोविंदांनी त्यांचे आभार व्यक्त केले आहेत.

गेल्या वर्षी १.२५ लाख गोविंदांना विमा संरक्षण देण्यात आले होते. मात्र, काही गोविंदा त्यापासून वंचित राहिले. यंदा ही त्रुटी दूर करत विमा कवचाची मर्यादा वाढवून १.५० लाख गोविंदांपर्यंत हे संरक्षण पोहोचवले जाणार आहे.

दहीहंडी २०२५ मध्ये गोविंदांसाठी विमा संरक्षण – शासन निर्णय निर्गमित

यावर्षी राज्यभरातील अंदाजे १,५०,००० गोविंदांना विमा संरक्षण प्रदान करण्यात येणार आहे. या योजनेअंतर्गत “दि ओरिएंटल इन्शुरन्स कंपनी लिमिटेड, मुंबई” या कंपनीचा प्रस्ताव शासनाने मान्य केला आहे.

महाराष्ट्र राज्य दहीहंडी गोविंदा असोसिएशन, अंधेरी (पूर्व), मुंबई यांच्यामार्फत आवश्यक कागदपत्रे सादर करून विमा रकमेचा खर्च शासनाकडून अदा केला जाणार आहे. क्रिडा व युवक सेवा विभाग, मुंबई यांना यासंदर्भात सुसंवाद आणि आवश्यक कार्यवाही करण्याचे निर्देश देण्यात आले आहेत.

एकूण रु. १,१२,५०,०००/- (एक कोटी बारा लाख पन्नास हजार रुपये) इतक्या रकमेचा विमा प्रस्ताव अंतिम मंजूर करण्यात आला आहे. त्यानुसार

उप सचिव (सुनील पांढरे) यांच्या स्वाक्षरीने जारी केलेल्या शासन आदेशानुसार संबंधित सर्व अधिकाऱ्यांनी योग्य ती कार्यवाही करून गोविंदांच्या सुरक्षिततेसाठी ही योजना तत्काळ राबवावी, असे स्पष्ट करण्यात आले आहे.

लाल परी आता करणार रिटेल (किरकोळ) इंधन विक्री..

प्रतिनिधी: अवधुत सावंत

   

मुंबई दि. ०१ :  उत्पन्नाचा नवा स्त्रोत निर्माण करण्याच्या हेतूने केंद्र व राज्य सरकारच्या व्यावसायिक भागिदारीतून एसटी महामंडळ राज्यभरात स्वतःच्या जागेवर विविध ठिकाणी व्यावसायिक तत्त्वावर पेट्रोल आणि डिझेल विक्रीचे रिटेल विक्री (किरकोळ विक्री) पंप सुरू करीत असल्याची माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी माध्यमांना दिली आहे.

मंत्री सरनाईक म्हणाले की, एसटी महामंडळाची आर्थिक स्थिती अत्यंत नाजूक आहे. अशा परिस्थितीमध्ये केवळ प्रवासी तिकीट विक्रीतून मिळणाऱ्या महसुलावर अवलंबून राहणे सोईस्कर नाही. त्यासाठी उत्पन्नाचे नवे स्त्रोत निर्माण करणे गरजेचे आहे. गेली ७० वर्षापेक्षा अधिक काळ एसटी महामंडळ 'इंडियन ऑइल' आणि 'भारत पेट्रोलियम' या सार्वजनिक क्षेत्रातील ऑइल कंपन्यांकडून डिझेल इंधन विकत घेत आहे. सध्या २५१ ठिकाणी एसटीच्या स्वतः च्या जागेवर पेट्रोल पंप उभारले असून या द्वारे केवळ एसटीच्या बसेस साठी डिझेल इंधनाचे वितरण होते. अर्थात, पेट्रोल पंप चालवणे आणि त्याचे देखभाल करण्याचा उत्तम अनुभव एसटी महामंडळाच्या पाठीशी आहे. त्यामुळे भविष्यात केंद्र सरकारचे सार्वजनिक उपक्रम असलेल्या 'इंडियन ऑइल', 'भारत पेट्रोलियम' आणि 'हिंदुस्तान पेट्रोलियम' या ऑइल विक्री करणाऱ्या कंपन्यांशी व्यावसायिक करार करून सर्वसामान्य ग्राहकांसाठी पेट्रोल आणि डिझेल व तत्सम इंधन विक्री करणारे पंप उभा करणे प्रस्तावित आहे.

असे पेट्रोल पंप हे रस्त्यालगत व व्यावसायीक दृष्ट्या मोक्याच्या ठिकाणी असणे आवश्यक आहे. त्यानुसार राज्यभरातील एसटी महामंडळाच्या स्वतःच्या ज्या जागा आहेत, त्यांचे सर्वेक्षण करण्यात आले असून अशा २५ बाय ३० मीटर जागा निश्चित करण्यात येत आहेत. या ठिकाणी एसटी महामंडळाचे केवळ इंधन विक्रीच नाही तर रिटेल शॉप देखील उभारले जाणार आहेत. त्यामुळे येथे इतर व्यवसायाला देखील पूरक संधी उपलब्ध होईल! यातून एसटी महामंडळाला सार्वजनिक भागिदारी तुन चांगला महसूल देखील मिळू शकतो.

मंत्री प्रताप सरनाईक पुढे म्हणाले की, इंडियन ऑइल, भारत पेट्रोलियम आणि हिंदुस्तान पेट्रोलियम या केंद सरकारच्या सार्वजनिक क्षेत्रातील इंधन विक्री करणाऱ्या कंपन्यांशी राज्य शासनाचा अंगीकृत उपक्रम असलेले एसटी महामंडळाशी व्यावसायिक भागीदारीचा करार करण्यात येईल! अर्थात, हा करार एका अर्थाने केंद्र आणि राज्य शासनाच्या दरम्यान होत असल्यामुळे मिळणाऱ्या उत्पन्नाच्या वितरणामध्ये पारदर्शकता राहील.

यासाठी संबंधित कंपन्यांनी राज्यभरात एस टी महामंडळाच्या सर्व जागांचे व्यावसायिक सर्वेक्षण करून २५१ ठिकाणी असलेल्या पेट्रोल पंपाचे एसटी महामंडळाच्या स्वतःच्या नव्या व्यवसायिक दृष्ट्या मोक्याच्या २५ बाय ३० मीटर जागेवर स्थलांतर केले जाईल, जिथे एसटी महामंडळाला स्वतःच्या बसेससाठी इंधन भरण्याची सोय असेल याचबरोबर सर्वसामान्य ग्राहकाला देखील किरकोळ इंधन विक्री करणे शक्य होईल. अशा पद्धतीचे "पेट्रो-मोटेल हब” उभा करण्याचा मानस व्यक्त केला आहे.

बत्तीस शिराळ्यात २३ वर्षांनंतर होणार जिवंत नागाची पूजा..

प्रतिनिधी: अवधुत सावंत

   

सांगली : राज्यभर नागपंचमीचा सण साजरा होt आहे. यामध्ये नागपूजेला विशेष महत्त्व असते. सांगली जिल्ह्यातील बत्तीस शिराळा हे गाव नागपंचमीच्या उत्सवासाठी संपूर्ण देशभर प्रसिद्ध आहे. या गावात जिवंत नागाची पकडून पूजा करण्याची प्रथा होती. ही अनोखी प्रथा पाहण्यासाठी अनेक जण या गावात नागपंचमीच्या दिवशी येत असतं. पण, या प्रथेला काही संघटनांनी आक्षेप घेतल्यानं त्यावर बंदी घाळण्याता निर्णय न्यायालयानं यापूर्वी घेतला होता. पण, आता २३ वर्षांनंतर ही प्रथा सुरु होणार आहे. केंद्र सरकारने याबाबत मोठा निर्णय घेतला आहे. शिक्षण आणि जनजागृतीच्या उद्देशाने २१ नागराज सापांना पकडण्यासाठी केंद्र सरकारने महाराष्ट्र सरकारला परवानगी दिली आहे. पर्यावरण, वन आणि हवामान बदल मंत्रालयाने वन्यजीव (संरक्षण) अधिनियम, १९७२ च्या कलम १२ च्या (ए) उपकलमांतर्गत ही मंजुरी दिली आहे.

राज्याच्या मुख्य वन्यजीव संरक्षकांनी मंत्रालयाकडे सांगली जिल्ह्यातील शिराळा वन परिक्षेत्रातून २१ नर नागराज साप पकडण्याची परवानगी मागितली होती. या परवानगीनुसार, २७ ते ३१ जुलै २०२५ या कालावधीतच सापांना पकडता येणार आहे. पकडलेले साप शिक्षण कार्यक्रम पूर्ण झाल्यानंतर त्यांच्या नैसर्गिक अधिवासात किंवा पकडलेल्या ठिकाणी सोडले जातील. केंद्राने ही परवानगी अनेक अटी व शर्तींसह दिली आहे, जेणेकरून सापांची सुरक्षितता आणि कल्याणाची खात्री केली जाईल.सापांची निवड आणि ओळख मुख्य वन्यजीव संरक्षक किंवा त्यांच्या अधिकृत अधिकाऱ्यांनी केली पाहिजे. साप पकडणे, सोडणे आणि शिक्षण हे सर्व स्थानिक वन/वन्यजीव अधिकाऱ्यांच्या उपस्थितीत, मुख्य वन्यजीव संरक्षकांनी ठरवल्याप्रमाणे केले पाहिजे.

या संपूर्ण प्रक्रियेची महाराष्ट्र राज्याच्या मुख्य वन्यजीव संरक्षकांनी योग्यरीत्या नोंद ठेवली पाहिजे. साप पकडण्याचा एकमेव उद्देश स्थानिक तरुण आणि समुदायामध्ये सापांच्या संवर्धनाविषयी पारंपरिक ज्ञान प्रसारित करणे, तसेच परिसंस्थेतील सापांचे महत्त्व आणि त्यांचे उपयोगाबद्दलची स्थानिक पारंपरिक ज्ञानाची पुढच्या पिढीमध्ये हस्तांतरण करणे हा आहे. कोणत्याही प्रकारचा व्यावसायिक वापर किंवा मनोरंजन करण्यास परवानगी नाही. संपूर्ण प्रक्रियेदरम्यान सापांना कोणतीही इजा किंवा हानी होणार नाही याची खात्री मुख्य वन्यजीव संरक्षकांनी करावी. सापांचा मृत्यू होणार नाही याची विशेष काळजी घेतली जावी आणि त्यांना सुरक्षितपणे त्यांच्या नैसर्गिक अधिवासात विहित वेळेत सोडावे.

हा संपूर्ण उपक्रम राज्य वन विभागाच्या (स्टेट फॉरस्ट डिपार्टमेंट) कठोर देखरेखीखाली होईल. यामध्ये प्रशिक्षित सर्पमित्र, पशुवैद्यकीय व्यावसायिक आणि पुरेशी वैद्यकीय सुविधा उपलब्ध असल्याची खात्री मुख्य वन्यजीव संरक्षकांनी करावी, जेणेकरून साप आणि सामान्य नागरिक दोघांचेही कल्याण जपले जाईल. साप पकडण्याच्या आणि सोडण्याच्या प्रत्येक टप्प्यावर योग्य पशुवैद्यकीय काळजी घेतली पाहिजे आणि अत्यंत सावधगिरीने ही प्रक्रिया पूर्ण करावी. सापांना पकडल्यानंतर उद्भवणाऱ्या गुंतागुंत टाळण्यासाठी योग्य काळजी घ्यावी.सापांच्या सुरक्षिततेला धोका निर्माण करणारी कोणतीही घटना घडल्यास, मंत्रालय दिलेल्या परवानगीचा आढावा घेण्याचा आणि गरज पडल्यास ती रद्द करण्याचा अधिकार राखून ठेवते. मुख्य वन्यजीव संरक्षकांनी लागू असलेल्या सर्व कायदे, नियम आणि नियमांनुसार पालन सुनिश्चित करावे.

ऍप आधारित रिक्षा-टॅक्सी आणि ई-बाईक सेवा आता राज्य सरकारकडून उपलब्ध..

प्रतिनिधी: अवधुत सावंत

   

मुंबई : राज्य सरकारने मराठी तरुणांना रोजगाराच्या संधी उपलब्ध करून देण्यासाठी ऍप आधारित प्रवासी वाहनसेवा सुरू करण्याच्या विचारात असून प्रवासी वाहतुकीसाठी ऍप आधारित रिक्षा,टॅक्सी व ई-बाईक सेवा आता खासगी कंपन्यांपुरती मर्यादित न राहता, परिवहन विभागाच्या सहकार्याने सुरू करण्यात येणाऱ्या या ऍप ला जय महाराष्ट्र, महा -राईड, महा-यात्री, महा-गो यापैकी एखादे नाव देणे प्रस्तावित आहे. अशी माहिती परिवहन मंत्री प्रताप सरनाईक यांनी दिली.

यासाठी मुख्यमंत्री देवेंद्र फडणवीस व दोन्ही उपमुख्यमंत्री एकनाथ शिंदे व अजित पवार यांच्या अंतिम मान्यतेने सदर शासकीय ऍप लवकरच कार्यान्वित होईल असा विश्वास त्यांनी व्यक्त केला. मंत्री प्रताप सरनाईक म्हणाले की, या उपक्रमाअंतर्गत ऍप विकसित करण्यासाठी ‘महाराष्ट्र इन्स्टिट्यूट फॉर ट्रान्सपोर्ट टेक्नॉलॉजी’ आणि ‘मित्र’ या संस्थेसह खासगी कंपन्यांशी चर्चा सुरू करण्यात आली आहे. यंत्रणेत पारदर्शकता ठेवण्यासाठी आवश्यक असलेल्या सर्व बाबींचा समावेश यात असून लवकरच ऍप तयार होणार आहे.

या माध्यमातून मराठी तरुण-तरुणींना विशेष आर्थिक पाठबळ देण्यात येणार आहे. बेरोजगार तरुण-तरुणींना रोजगार देण्यासाठी मुंबई बँकेच्या माध्यमातून वाहन खरेदीसाठी १० टक्के व्याजदराने कर्ज दिले जाणार आहे. अशी ग्वाही मुंबै बँकेचे अध्यक्ष प्रवीण दरेकर यांनी दिली. ते म्हणाले की, मुंबै बँकेच्या मदतीने बेरोजगार तरुण-तरुणींना अर्थसहाय उपलब्धता होईल. तसेच अण्णासाहेब आर्थिक विकास महामंडळ, भटके विमुक्त महामंडळ, ओबीसी महामंडळ आणि एमएसडीसी या संस्थांतर्फे ११ टक्के व्याज परतावा अनुदानाच्या स्वरूपात दिला जाणार आहे. त्यामुळे हे कर्ज बिनव्याजी असल्यासारखे आहे.

मंत्री सरनाईक पुढे म्हणाले की, केंद्र सरकारच्या अ‍ॅग्रीगेटर मार्गदर्शक तत्वानुसार या ऍप ची नियमावली अंतिम टप्यात आहे. सध्या खाजगी संस्था अनाधिकृत ऍप च्या माध्यमातून प्रचंड नफा कमावतात. त्यासाठी त्या कंपन्या चालक व प्रवासी यांची लूट करीत आहेत. सरकारकडे यंत्रणा, तंत्रज्ञान आणि मनुष्यबळ मुबलक प्रमाणात असल्यामुळे शासनाने असे ॲप विकसित केल्यास त्याचा फायदा प्रवाशांच्या बरोबर चालकांना देखील होईल. या संदर्भात ५ ऑगस्ट रोजी मंत्रालयात संबंधितांची बैठक आयोजित केली आहे. या बैठकीला आमदार प्रवीण दरेकर या ऍप निर्मितीचे तंत्रज्ञ व शासकीय अधिकारी उपस्थित असतील, त्यामुळे या बैठकीत या शासकीय ऍप ला अंतिम स्वरूप देण्यात येणार आहे. अशी माहिती परिवहन मंत्री प्रताप सरनाईक यांनी दिली.

राज्यात तिसरी ते दहावीसाठी नवीन अभ्यासक्रम जाहीर..

प्रतिनिधी: अवधुत सावंत

   

मुंबई : राज्य शैक्षणिक संशोधन आणि प्रशिक्षण परिषदेने (एससीईआरटी) तिसरी ते दहावीच्या विद्यार्थ्यांसाठी सुधारित अभ्यासक्रम जाहीर केला आहे. विशेष म्हणजे, या मसुद्यातून हिंदी भाषा सध्या वगळण्यात आली आहे. अभ्यासक्रमात मराठी, इंग्रजी, गणित, विज्ञान, इतिहास, भूगोल, राज्यशास्त्र, अर्थशास्त्र, कलाशिक्षण, व्यावसायिक शिक्षण, शारीरिक शिक्षण आणि पायाभूत मूल्य शिक्षणाचा समावेश आहे.

गेल्या काही महिन्यांपासून महाराष्ट्राच्या शिक्षण क्षेत्रात हिंदी भाषेच्या सक्तीवरून पेटलेला वाद असताना हा सुधारित अभ्यासक्रम जाहीर करण्यात आळा आहे. राज्य सरकारने पहिलीपासून हिंदी सक्तीचा अध्यादेश काढल्यानंतर, महाराष्ट्र नवनिर्माण सेनेचे (मनसे) प्रमुख राज ठाकरे यांनी या निर्णयाला तीव्र विरोध दर्शवला होता. यानंतर सरकारने त्रिभाषा सूत्र लागू करण्याचा निर्णय तात्पुरता मागे घेतला. आता राज्य शासनाने नवीन अभ्यासक्रमाचा मसुदा जाहीर केला असून, यात सध्या तरी मराठी आणि इंग्रजी या दोनच भाषांना स्थान देण्यात आले आहे.

एससीईआरटीचे संचालक डॉ. राहुल रेखावार यांनी स्पष्ट केले की, सध्या पहिली व दुसरी भाषा म्हणून मराठी आणि इंग्रजीचा अभ्यासक्रम तयार करण्यात आला आहे. तिसऱ्या भाषेचा समावेश हा त्रिभाषा सूत्राचा अभ्यास करण्यासाठी नेमलेल्या समितीच्या शिफारशींवर आणि शासनाच्या अंतिम निर्णयावर अवलंबून असेल. नवीन अभ्यासक्रमाचा मसुदा राष्ट्रीय शिक्षण धोरण २०२० च्या दिशानिर्देशांनुसार तयार करण्यात आला आहे. यात अनेक महत्त्वाचे बदल प्रस्तावित आहेत. यात व्यावसायिक शिक्षणाला प्रोत्साहन, भारतीय ज्ञान प्रणालीचा समावेश, वाहतूक सुरक्षा, नागरी संरक्षण आणि समाजसेवा यांसारख्या समकालीन विषयांनाही नव्या अभ्यासक्रमात स्थान मिळाले आहे.चौथीसाठीचे ‘शिवछत्रपती’ हे पाठ्यपुस्तक कायम राहणार आहे.

या प्रस्तावित मसुद्यावर राज्यभरातील शिक्षणतज्ज्ञ, शिक्षक, अभ्यासक, पालक, अधिकारी आणि नागरिकांनी अभिप्राय द्यावा, असे आवाहन एससीईआरटीने केले आहे. हा मसुदा <www.maa.ac.in> या संकेतस्थळावर २८ जुलैपासून उपलब्ध असून, २७ ऑगस्ट २०२५ पर्यंत ऑनलाइन अभिप्राय नोंदवता येणार आहे.

पहलगाम आतंकवादी हल्ल्याचा मास्टरमाइंड हाशिम मुसासह तीन दहशतवादी ठार..

प्रतिनिधी अवधुत सावंत

   

श्रीनगर : भारतीय लष्कराच्या 'ऑपरेशन महादेव" अंतर्गत भारतीय सैन्याने आज श्रीनगरच्या लिडवास भागात लपलेल्या तीन पाकिस्तानी दहशतवाद्यांना ठार मारले. चिनार कॉर्प्सने एक्स वर हे वृत्त दिले. ठार झालेल्या दहशतवाद्यांमध्ये पहलगाम हल्ल्यातील मुख्य आरोपी हाशिम मुसा देखील होता. वृत्तसंस्था पीटीआयनुसार, लष्कराच्या अधिकाऱ्यांनी पुष्टी केली आहे की मारला गेलेला दहशतवादी हाशिम मुसा होता. इतर दहशतवाद्यांची ओळख पटवण्याचे प्रयत्न सुरू असल्याचे लष्कराच्या प्रवक्त्याने सांगितले. उर्वरित दोन दहशतवाद्यांपैकी एकाचा २०२४ मध्ये सोनमर्ग बोगदा प्रकल्पावरील हल्ल्यात सहभाग असल्याचे सांगितले जात आहे.

दहशतवाद्यांकडून अमेरिकन एम४ कार्बाइन, एके-४७, १७ रायफल आणि ग्रेनेड जप्त करण्यात आले आहेत. काही इतर संशयास्पद वस्तू देखील जप्त करण्यात आल्या आहेत. मंगळवारी लष्कराकडून ऑपरेशन महादेवची माहिती दिली जाऊ शकते.

लष्कराच्या म्हणण्यानुसार, सकाळी ११ वाजता गुप्तचर माहिती मिळाल्यानंतर लिडवासमध्ये शोध मोहीम सुरू करण्यात आली. यादरम्यान, दुरून दोनदा गोळीबाराचा आवाज ऐकू आला. या भागात सुरक्षा दलांची तैनाती वाढवण्यात आली आहे. २२ एप्रिल रोजी झालेल्या या हल्ल्यात २६ जणांचा मृत्यू झाला होता आणि १६ जण गंभीर जखमी झाले होते. दहशतवाद्यांनी पर्यटकांना त्यांच्या धार्मिक ओळखीच्या आधारे निवडकपणे लक्ष्य केले होते. ही घटना पहलगाम शहरापासून ६ किमी अंतरावर असलेल्या बैसरन खोऱ्यात घडली.

हल्ल्यानंतर केलेल्या तपासात तीन दहशतवाद्यांची नावे उघड झाली. २४ एप्रिल रोजी अनंतनाग पोलिसांनी ३ रेखाचित्रे प्रसिद्ध केली. तिन्ही दहशतवाद्यांची नावे अनंतनागचा आदिल हुसेन ठोकर, हाशिम मुसा उर्फ सुलेमान आणि अली उर्फ तल्हा भाई अशी आहेत. मुसा आणि अली हे पाकिस्तानी आहेत. मुसा हा पाकिस्तानच्या स्पेशल सर्व्हिस ग्रुपमध्ये कमांडो होता. त्यांच्यावर प्रत्येकी २० लाख रुपयांचे बक्षीसही ठेवण्यात आले आहे. एनआयएने अटक केलेल्या दोन आरोपींनी या तीन दहशतवाद्यांची नावे उघड केली आहेत की इतर काही दहशतवाद्यांची नावे हे सध्या स्पष्ट झालेले नाही.

महाराष्ट्राची दिव्या देशमुख नवी महिला बुद्धिबळ जागतिक विजेती..

प्रतिनिधी: अवधुत सावंत

   

युरोप : जॉर्जियामधील बटुमी येथे पार पडलेल्या FIDE महिला बुद्धिबळ विश्वचषक २०२५ स्पर्धेत भारताच्या दिव्या देशमुखने अभूतपूर्व कामगिरी करत अंतिम फेरीत अनुभवी ग्रँडमास्टर कोनेरू हम्पीला पराभूत करून भारताची पहिली महिला विश्वविजेती ठरली आहे. दिव्या देशमुखने वयाच्या केवळ १९व्या वर्षी हे यश संपादन करून भारताच्या बुद्धिबळ क्षेत्रात एक नवा विक्रम प्रस्थापित केला आहे. या विजयामुळे दिव्या देशमुख भारताची चौथी महिला ग्रँडमास्टर बनण्याच्या दिशेने मोठं पाऊल टाकत आहे. दिव्याने भारताची ८८ वी ग्रँडमास्टर होण्याचा मानही मिळवला.

या स्पर्धेच्या वैशिष्ट्यपूर्ण गोष्टींपैकी एक म्हणजे अंतिम फेरीत दोन भारतीय महिला खेळाडू एकमेकांविरुद्ध खेळत होत्या. कोनेरू हम्पीच्या अनुभवासमोर दिव्याच्या धाडसी निर्णयक्षमता आणि सखोल तयारीचा विजय झाला. यामधून भारताच्या बुद्धिबळ क्षमतेचं आंतरराष्ट्रीय स्तरावर ठोस प्रदर्शन झालं आणि चीनसारख्या बलाढ्य बुद्धिबळ राष्ट्रांवर मात करण्यात भारत यशस्वी झाला.

FIDE महिला विश्वचषक २०२५ च्या अंतिम फेरीतील विजेत्या दिव्या देशमुखला सुमारे ४२ लाख रुपये आणि उपविजेत्या कोनेरू हम्पीला सुमारे ३० लाख रुपये बक्षिसे मिळतील. याशिवाय, या खेळाडूंनी अत्यंत प्रतिष्ठित ‘कॅन्डिडेट्स’ स्पर्धेसाठी देखील पात्रता मिळवली आहे.

बुद्धिबळ तज्ञांनी दिव्याच्या विजयाचे विशेष कौतुक केले असून विश्वनाथन आनंद यांच्यासारख्या दिग्गजांनी तिच्या खेळातील परिपक्वता आणि आत्मविश्वासाची प्रशंसा केली आहे. या यशामुळे देशभरात नवोदित बुद्धिबळपटूंना प्रेरणा मिळेल आणि महिलांच्या सहभागास नवे दालन खुले होईल असा विश्वास व्यक्त केला जात आहे.

'जे एम एफ' शिक्षण संस्थेमध्ये ३० शाळेच्या ४००० विद्यार्थ्यांसोबत ४ दिवसीय 'जे एम एफ' गुरू पौर्णिमा आंतरशालेय स्पर्धांचे व कारगिल दिवसाचे भव्य आयोजन..

प्रतिनिधी: अवधुत सावंत

डोंबिवली : 'जे एम एफ' शिक्षण संस्थेचे २०२५ हे वर्ष "रजत महोत्सव" म्हणून साजरे होत आहे. संपूर्ण वर्षभर विविध कार्यक्रमांचे आयोजन संस्थेमध्ये करण्यात येत आहे. शालेय विद्यार्थ्यांच्या अंगभूत कला गुणांना वाव मिळण्यासाठी दरवर्षी प्रमाणेच या वर्षी देखील 'जे एम एफ' शिक्षण संस्थेमध्ये गुरू पौर्णिमा निमित्त विविध स्पर्धांचे आयोजन दिनांक २३ ते २६ जुलै या चार दिवसांमध्ये करण्यात आले. दिनांक २३ व २४ जुलै रोजी अनुक्रमे बुद्धिबळ आणि चित्रकला व प्रश्न मंजुषा स्पर्धेचे आयोजन केले गेले तर दिनांक २५ व २६ जुलै रोजी अनुक्रमे एकांकिका नाटक, पथनाट्य, व समूह गायन तसेच समूह नृत्य आणि शिशुविहरचे वेशभूषा स्पर्धांचे आयोजन करण्यात आले होते.

'जे एम एफ' शिक्षण संस्थेचे संस्थापक अध्यक्ष डॉ. राजकुमार कोल्हे, संस्थापिका सचिव डॉ. प्रेरणा कोल्हे, व इतर पदाधिकारी यांच्या हस्ते सरस्वती पूजन व महर्षी वेद व्यास पूजन करण्यात आले. पथनाट्य व एकांकिका स्पर्धेचे परीक्षक श्री. रमेश जाधव व निहारिका राजदत्त यांनी परीक्षण केले तर समूह गायनाचे परीक्षक श्री. श्रीधर अय्यर यांनी केले. समूह नृत्याचे परिक्षक श्री. भावेश बोमेरा व रेशम कदम यांनी परीक्षण केले तर शिशु विहार च्या वेशभूषा स्पर्धेचे परीक्षण मिस डोंबिवलीकर आणि मिस कल्याण मुकुट विजेत्या निशिता शिंदे व श्वेता जगताप यांनी केले.

"सा कला या विमुक्तये" म्हणजेच कला ही सर्व बंधनातून मुक्त करते असे सांगत  संस्थेचे संस्थापक डॉ. राजकुमार कोल्हे यांनी पुढे आपल्या भाषणात नमूद केले की, प्रत्येक क्षणाला मनुष्याच्या चेहऱ्यावरचे हावभाव बदलत असतात, बोलताना देखील न कळतपणे अभिनय होत असतो. जन्मतःच घेऊन आलेली ही अभिनय कला म्हणजे दैवी देणगी आहे. आज मोठ्या प्रमाणात उपस्थित असलेले सर्व विद्यार्थ्यांचे स्वागत करून तुम्हाला अभिनय स्पर्धेसाठी शुभेच्छा देतो असे संस्थापक अध्यक्ष डॉ. राजकुमार कोल्हे यांनी विद्यार्थांना सांगितले तर अभिनयाबरोबरच संगीत ऐकणे, गाणे म्हणणे म्हणजे स्वतः बरोबरच इतरांना देखील आनंद देणे होय. बाळ जन्माला येते ते रडतच येते, त्यातही सूर गवसतो, बोबडे बोल बोलताना देखील आलाप, ताना ऐकायला मिळतात अशी ही अभिजात संगीताची दैवी देणगी सर्वानाच असते. फक्त त्याला पैलू पडण्याचे काम संगीताचे गुरू करत असतात, असे संस्थापिका सचिव डॉ. प्रेरणा कोल्हे यांनी समूह गान स्पर्धेच्या वेळी मुलांना सांगून त्यांना शुभेच्छा दिल्या.

वेशभूषा स्पर्धांची छोटी मुले बघून जणू काही 'जे एम एफ' शिक्षण संस्थेमध्ये, "हिरवे हिरवे गार गालीचे, हरित तृणांच्या मखमलीचे.." असेच भासत होते. वेशभूषेची "निसर्ग थीम" असल्या कारणाने सर्व सहभागी विद्यार्थी झाडे, वेली, फुले आणि अन्य प्रकारे सजून आली होती. समूह नृत्यांमध्ये देखील असंख्य मुलांनी सहभाग दर्शवला होता. जिंकलेल्या सर्व विद्यार्थ्यांना संस्थापक अध्यक्ष डॉ. राजकुमार कोल्हे, संस्थापिका सचिव डॉ. प्रेरणा कोल्हे, खजिनदार व दिग्दर्शिका जाह्नवी कोल्हे व मान्यवरांच्या हस्ते पदके, चषक, प्रशस्तीपत्रक देण्यात आले तसेच सहभागी झालेल्या विद्यार्थ्यांना देखील सहभाग प्रशस्तीपत्रक देण्यात आले. जास्तीत जास्त संख्येने सहभागी झालेल्या 'डॉन बॉस्को' शाळेला सर्वोत्कृष्ट सहभागी शाळा ६५० विद्यार्थी म्हणून मोठे चषक देण्यात आले.

'जे एम एफ' शिक्षण संस्थेचे २०२५ हे वर्ष रौप्य महोत्सव म्हणून साजरे होत आहे, त्या निमित सहभागी झालेल्या प्रत्येक शाळेला 'जे एम एफ' शिक्षण संस्थेकडून "स्मृतिचिन्ह" देण्यात आले. चार दिवस सुरु असलेल्या या स्पर्धामध्ये सुमारे चार हजारांच्या वर विद्यार्थ्यांनी सहभाग नोंदवला होता. संगीत शिक्षिका सौ. श्रेया कुलकर्णी, नृत्य शिक्षक श्री. अभिषेक देसाई आणि दीपाली सोलकर, नाट्य विभागाचे शिक्षक श्री. प्रमोद पगारे,  मुख्याध्यापिका सौ. ज्योती व्यंकटरामण व तेजावती  कोटीयन , महाविद्यालयाचे प्राचार्य, प्राध्यापक श्री. अलपेश खोब्रागडे, श्री. विठ्ठल कोल्हे, शिशुविहरच्या उपमुख्याध्यापिका सौ. मयुरी खोब्रागडे तसेच इतर सर्व सहकारी शिक्षक, शिक्षकेतर कर्मचारी, सर्व विद्यार्थी प्रतिनिधी यांनी 'जे एम एफ' गुरुपौर्णिमा आंतरशालेय स्पर्धा उत्तमरित्या नियोजन करून यशस्वीरित्या पार पाडल्या.

२६ जुलै हा "कारगिल विजय दिवस" म्हणून ओळखला जातो. येत्या ९ ऑगस्ट ला राखी पौर्णिमाचे औचित्य साधून जन गण मन इंग्रजी माध्यमिक शाळा आणि विद्यामंदिर मधील सर्व विद्यार्थिनींनी स्वतःच्या हाताने राखी तयार करून सीमेवर कार्यरत असलेल्या आपल्या बंधू जवानांना राखी पोहचती केली, यावेळी आपल्या भारत देशाचा झेंडा फडकवत शहीद झालेल्या जवानांना आदरांजली वाहिली व वंदे मातरम् म्हणून कार्यक्रमांची सांगता झाली.

भारत विकसीत करतोय जगातील पहिला ड्युअल स्टेल्थ 'रामा' (RAMA) ड्रोन..

प्रतिनिधी: अवधुत सावंत

   

हैदराबाद : भारतात जगातील पहिला ड्युअल स्टेल्थ ड्रोन विकसीत केला जात आहे. याचे वैशिष्ट्य म्हणजे हा ड्रोन केवळ शत्रूच्या हाय-रेझोल्यूशन रडार आणि इन्फ्रारेड सिग्नलपासून बचाव करणार नाही, तर काही सेकंदात हल्ला करण्यास देखील सक्षम असेल. या ड्रोनचे सर्वात मोठे वैशिष्ट्य म्हणजे ‘रडार ऍब्सॉर्प्शन ऍण्ड मल्टीस्पेक्ट्रल ऍडॉप्टिव्ह’ तंत्रज्ञान रामा (RAMA) या तंत्रज्ञानावर आधारित ड्रोनला रामा (RAMA) असे नावही देण्यात आले आहे. या ड्रोनचे वजन १०० किलो आहे आणि ते ५० किलोपर्यंत वजन वाहून नेऊ शकते. रामासह हे ड्रोन २०२५ च्या अखेरीस भारतीय नौदलाकडे सोपवले जाऊ शकते.

हे एक विशेष स्वदेशी कोटिंग मटेरियल आहे, जे रडार आणि इन्फ्रारेड डिटेक्शन ९७% कमी करते. यामुळे ड्रोन शत्रूच्या रडार आणि इन्फ्रारेड सिग्नलपासून पूर्णपणे लपू शकतो. सध्या, फक्त अमेरिका, चीन आणि रशियाकडेच रडारपासून लपणारे स्टेल्थ ड्रोन आहेत.

संरक्षण मंत्रालयाच्या मदतीने हैदराबादस्थित स्टार्टअप कंपनी 'वीरा डायनॅमिक्स आणि बिनफोर्ड रिसर्च लॅब' हे ड्रोन विकसित करत आहे. ड्रोन तयार करण्यासाठी वीरा डायनॅमिक्सने त्यांचे रामा (RAMA) वापरले आहे आणि बिनफोर्ड लॅब्सने त्यांचे स्वायत्त ड्रोन तंत्रज्ञान त्यात समाविष्ट केले आहे.

१ ऑगस्टपासून होणार UPI च्या नियमांमध्ये मोठे बदल..

प्रतिनिधी: अवधुत सावंत

   

मुंबई, दि. २५ : येत्या १ऑगस्ट, २०२५ पासून उपि च्या नियमांमध्ये काही मोठे बदल होणार आहेत. हे बदल GPay, PhonePe, Paytm यांसारखे ऍप्स वापरणाऱ्या सर्व ग्राहकांवर लागू होतील. हे बदल UPI सेवा अधिक चांगली, सुरळीत आणि विश्वासार्ह बनवण्यासाठी करण्यात येत आहेत.

आता तुम्ही एका UPI ऍपवरून एका दिवसात फक्त ५० वेळाच तुमच्या बँक खात्यातील शिल्लक (बॅलन्स) तपासू शकाल. वारंवार बॅलन्स चेक केल्याने सर्वरवर अनावश्यक दबाव येतो, तो कमी करण्यासाठी हा नियम आणला आहे.

तुमच्या मोबाईल नंबरशी जोडलेल्या बँक खात्यांची यादी तुम्ही एका दिवसात फक्त २५ वेळाच पाहू शकाल. यामुळे अनावश्यक एपीआय कॉल्स कमी होतील आणि युपीआय सेवा अधिक सुरळीत चालेल.

नेटफ्लिक्स, म्युच्युअल फंड एसआयपी किंवा इतर बिलांचे ऑटोपे व्यवहार आता फक्त कमी गर्दीच्या (नॉन-पीक) वेळेतच पूर्ण होतील. यासाठी सकाळी १० वाजण्यापूर्वी, दुपारी १ ते संध्याकाळी ५ वाजेदरम्यान, रात्री ९:३० नंतर या तीन वेळा ठरवण्यात आल्या आहेत.

एखादा व्यवहार अयशस्वी झाल्यास (फेल झाल्यास), तुम्ही दिवसातून फक्त ३ वेळाच त्याचे स्टेटस तपासू शकाल. तसेच, प्रत्येक वेळी स्टेटस तपासण्यासाठी किमान ९० सेकंदांचे अंतर ठेवावे लागेल. यामुळे सर्वरवरील भार कमी होऊन व्यवहारांच्या परतीची (रिव्हर्सल) किंवा पुन्हा प्रयत्न करण्याची (रिट्राई) शक्यता वाढेल.

३० जून २०२५ पासून एक महत्त्वाचा बदल आधीच लागू झाला आहे. तो म्हणजे आता तुम्ही कोणाला पैसे पाठवाल, तेव्हा पेमेंट करण्यापूर्वी तुम्हाला त्या व्यक्तीचे बँकेत नोंदणीकृत नाव दिसेल. यामुळे चुकीच्या खात्यात पैसे जाण्याचा किंवा फसवणुकीचा धोका मोठ्या प्रमाणात कमी झाला आहे.

लाडकी बहीण योजनेच्या महिलांचे पैसे लाटणाऱ्या 'लाडक्या पुरुषां'कडून होणार वसुली..

प्रतिनिधी: अवधुत सावंत

मुंबई : महायुती सरकारने सुरू केलेली 'लाडकी बहीण योजना' वारंवार नवनव्या वादात अडकत आहे. कधी निधीमुळे तर कधी लाभार्थींवरुन लाडकी बहीण योजना वादग्रस्त ठरत असल्याचं दिसून येत आहे. आता तर पुरुषांनी लाडकी बहीण योजनेचा लाभ घेतल्याचं समोर आले आहे. 

लाडकी बहीण योजनेसाठी सरकारकडून वर्षाला ४० हजार कोटींचा खर्च येत आहे. याचा लाभ पुरुषांनी घेतल्याचंही समोर आलं आहे. गेल्या दहा महिन्यात लाडक्या पुरुषांना २१ कोटी ४४ लाख रुपयांचं वाटप झाल्याची माहिती आहे. त्यामुळे आता या लाडक्या पुरुषांवर कारवाई होणार असल्याचं सांगितलं जात आहे. 

उपमुख्यमंत्री अजित पवार यांनी शनिवारी सांगितलं की, महाराष्ट्र सरकारच्या लाडकी बहीण योजनेत धोका देऊन भाग होणाऱ्या पुरुषांविरोधात कारवाई केली जाईल आणि त्यांच्याकडून ही रक्कम वसूल केली जाईल. या लाडकी बहीण योजनेतील १४ हजार पुरुष लाभार्थी आहेत. या योजनेअंतर्गत महिलांना दरमहिन्याला १५०० रुपये मिळतात. यासाठी वार्षिक उत्पन्न, कुटुंबाची स्थिती याबाबत अनेक निकष लावण्यात आले आहेत. ही योजना गेल्या वर्षी २०२४ च्या ऑगस्टमध्ये सुरू झाली होती. यामुळे २०२४ च्या विधानसभा निवडणुकीत महायुतीला फायदा झाला. याबाबत अजित पवार म्हणाले, सरकारी नोकरी करणाऱ्या काही महिलादेखील लाभार्थी झाल्या होत्या, त्यांची नावं हटविण्यात आली आहे.

‘डिजिटल गव्हर्नन्स’ ही गरज नाही तर आवश्यकता - मुख्यमंत्री देवेंद्र फडणवीस

प्रतिनिधी: अवधुत सावंत

मुंबई : महाराष्ट्राचे मुख्यमंत्री देवेंद्र फडणवीस यांच्या प्रमुख उपस्थितीत मुंबईत माहिती तंत्रज्ञान विभाग, महाराष्ट्र शासन आणि ‘समग्र’ संस्था यांच्यामध्ये ‘ई-गव्हर्नन्स’ सुधारणांना गती देण्यासाठी सामंजस्य करार करण्यात आला. डिजिटल रेग्युलेशन आणि शासकीय प्रणालीच्या आधुनिकीकरणात महाराष्ट्र राज्याने नेहमीच देशात आघाडी घेतली आहे. आता डिजिटल गव्हर्नन्स ही केवळ सुविधा न राहता, काळाची गरज बनली आहे. सर्व शासकीय योजना आणि सेवा ऑनलाईन प्रणालीद्वारे नागरिकांपर्यंत सहज पोहोचतील.

‘नो ऑफिस डे’ सारख्या उपक्रमातून नागरिकांना कार्यालयात प्रत्यक्ष उपस्थित राहण्याची गरज भासणार नाही सर्व प्रक्रिया ऑनलाईन पूर्ण करता येणार आहेत. भविष्यात शासकीय सेवा व्हॉट्सऍप सारख्या सहज वापरता येणाऱ्या प्लॅटफॉर्मवर उपलब्ध होतील. यासाठी प्रत्येक विभागाने आपापली उद्दिष्टे, कालमर्यादा आणि अंमलबजावणीची रूपरेषा निश्चित करून त्यानुसार काम करणे आवश्यक ठरेल. संपूर्ण प्रक्रियेत नागरिकांचा सक्रीय सहभाग अत्यंत महत्त्वाचा असून, शासन व नागरिक यांच्यातील समन्वय साधल्यास शासनाच्या सेवा अधिक प्रभावी पद्धतीने सामान्यांपर्यंत पोहोचतील.

त्याचबरोबर शासनाचे सकारात्मक ब्रँडिंगही सुनिश्चित होईल. या सामंजस्य करारामुळे शासकीय व्यवस्थेत मूलभूत आणि दीर्घकालीन परिवर्तन घडणार असून, या उपक्रमासाठी मुख्यमंत्री देवेंद्र फडणवीस यांनी ‘समग्र’ संस्थेला शुभेच्छा दिल्या. यावेळी मंत्री ऍड. आशिष शेलार, समग्रचे संस्थापक आणि मुख्य कार्यकारी अधिकारी गौरव गोयल आणि इतर मान्यवर उपस्थित होते.