संदिप कसालकर
दिल्लीतील महाराष्ट्र सदनमध्ये आंबा महोत्सव; पंतप्रधान मोदींच्या उपस्थितीला हिरवा कंदील
खासदार रविंद्र वायकर यांच्या संकल्पनेतून ३० एप्रिल व १ मे रोजी आयोजन
दिल्लीकरांना थेट कोकणातील हापूस आंब्याची चव चाखण्याची संधी
सांस्कृतिक कार्यक्रमांसह कोकणातील शेतकऱ्यांसाठी नवीन बाजारपेठ निर्माण होणार
नवी दिल्ली : कोकणातील सुप्रसिद्ध देवगड आणि रत्नागिरी हापूस आंब्याला अधिक बाजारपेठ मिळावी आणि दिल्लीकरांना त्याचा आस्वाद घेता यावा, या उद्देशाने महाराष्ट्र सदन, नवी दिल्ली येथे ३० एप्रिल आणि १ मे रोजी "आंबा महोत्सव" आयोजित केला जाणार आहे. खासदार रविंद्र वायकर यांच्या संकल्पनेतून या महोत्सवाला मूर्त स्वरूप मिळत आहे. विशेष म्हणजे, पंतप्रधान नरेंद्र मोदी यांनी या महोत्सवाच्या उद्घाटनासाठी तत्वतः संमती दिली आहे.
कोकणचा राजा हापूस थेट दिल्लीत
कोकणातील हापूस आंबा केवळ महाराष्ट्रातच नव्हे, तर संपूर्ण देशभर प्रसिद्ध आहे. मात्र, थेट विक्रीव्यवस्थेच्या अभावामुळे शेतकऱ्यांना त्याचा पुरेसा लाभ मिळत नाही. ही बाब लक्षात घेऊन खासदार वायकर यांनी दिल्लीतील महाराष्ट्र सदन येथे दोन दिवसांच्या आंबा महोत्सवाचे आयोजन केले आहे.
या महोत्सवात दिल्लीकरांना थेट शेतकऱ्यांकडून हापूस आंबा खरेदी करता येणार आहे. तसेच, सांस्कृतिक कार्यक्रम, कोकणी खाद्यपदार्थ आणि पारंपरिक कलांचे सादरीकरण देखील होणार आहे.
पंतप्रधान मोदींसोबत चर्चा; विविध मागण्या मांडल्या
या महोत्सवाच्या निमित्ताने खासदार रविंद्र वायकर यांनी पंतप्रधान नरेंद्र मोदी यांची भेट घेऊन त्यांना महोत्सवाचे निमंत्रण दिले. शेतीमालाला मोठ्या बाजारपेठा मिळाव्यात यासाठी सरकारने पुढाकार घ्यावा, असे पंतप्रधानांनी या चर्चेदरम्यान सुचवले.
याच भेटीत खासदार वायकर यांनी मुंबईतील पाणीटंचाईच्या पार्श्वभूमीवर गारगाई-पिंजाळ प्रकल्प लवकर पूर्ण करण्याची गरज असल्याचे सांगितले. यावर पंतप्रधानांनी जलसंधारण आणि रेन वॉटर हार्वेस्टिंगला अधिक महत्त्व देण्याची सूचना केली.
तसेच, मुंबईत एम्सच्या धर्तीवर अत्याधुनिक रुग्णालय सुरू करून कर्करोग उपचार सुविधा उपलब्ध करून द्याव्यात, अशीही मागणी खासदार वायकर यांनी केली. यावर पंतप्रधान मोदींनी सकारात्मक प्रतिसाद दिला.
शेतकऱ्यांसाठी सुवर्णसंधी
आंबा महोत्सवाचा उद्देश केवळ हापूसचा प्रचार करणे हा नसून, शेतकऱ्यांना थेट ग्राहकांपर्यंत पोहोचवणे आणि त्यांना त्यांच्या उत्पादनाचा योग्य मोबदला मिळवून देणे हा मुख्य हेतू आहे.
या महोत्सवाला महाराष्ट्राचे मुख्यमंत्री, उपमुख्यमंत्री तसेच विविध राज्यांतील खासदार, आमदार आणि मान्यवर उपस्थित राहणार आहेत. त्यामुळे कोकणातील आंबा उत्पादकांना मोठ्या बाजारपेठेचे दरवाजे खुला करण्याची संधी मिळणार आहे.
दिल्लीकरांसाठी खास कोकणी स्वाद
या महोत्सवामुळे दिल्लीतील नागरिकांना थेट शेतकऱ्यांकडून अस्सल हापूस आंबा खरेदी करण्याची संधी मिळेल. याशिवाय, कोकणातील पारंपरिक चव आणि सांस्कृतिक वारशाची अनुभूती देखील या महोत्सवाच्या माध्यमातून घेता येणार आहे.
