नवी दिल्ली - पंतप्रधान नरेंद्र मोदी यांनी आज आंतरराष्ट्रीय अंतराळ स्थानकावर (आयएसएस) उपस्थित असलेल्या भारतीय अंतराळवीर ग्रुप कॅप्टन शुभांशू शुक्ला यांच्याशी थेट संवाद साधला. व्हिडिओ कॉलद्वारे पार पडलेला हा संवाद देशभरात प्रसारित झाला आणि नागरिकांनी त्याला भरभरून प्रतिसाद दिला. शुक्ला हे 'अ‍ॅक्सिओम स्पेसच्या एएक्स-४' मोहिमेचे मिशन पायलट आहेत आणि १९८४ नंतर अंतराळात गेलेले पहिले भारतीय अंतराळवीर म्हणून ओळखले जातात. त्यांनी फ्लोरिडा मधील नासाच्या केनेडी स्पेस सेंटरमधून स्पेस एक्स च्या ड्रॅगन यानातून उड्डाण घेतलं होतं, ज्याअंतर्गत सात महत्त्वाचे वैज्ञानिक प्रयोग सध्या अंतराळात राबवले जात आहेत.
संवादादरम्यान पंतप्रधान मोदींनी विचारले की, अंतराळात पोहोचल्यावर त्यांच्या मनात पहिला विचार कोणता आला? त्यावर शुक्ला म्हणाले की, बाहेरून पृथ्वी पाहताना कोणतीही सीमारेषा दिसत नाही, ती एकसंध आणि विलक्षण भासते. “तेव्हा ‘वसुधैव कुटुंबकम्’ या आपल्या संस्कृतीचा खरा अर्थ समजला,” असे त्यांनी आवर्जून सांगितले. त्यांनी पुढे अंतराळात सुरू असलेल्या प्रयोगांविषयी माहिती दिली, विशेषतः स्टेम सेल्सवरील प्रयोग वृद्धांच्या आरोग्यासाठी उपयुक्त ठरू शकतात, असंही ते म्हणाले. या संवादात एक हलकीशी हास्याची लहरही उमटली, जेव्हा शुक्ला यांनी त्यांच्या टीमला अंतराळात गाजराचा हलवा दिल्याचं आनंदाने सांगितलं, त्यावर मोदींनी हसून प्रतिक्रिया दिली – “तुमच्यातला भारतीयपणा तुमच्या अन्नातही दिसतो!”
हा संपूर्ण संवाद केवळ वैज्ञानिक दृष्टिकोनातून नव्हे, तर भावनिक आणि सांस्कृतिक बंध प्रस्थापित करणारा ठरला. भारताच्या अंतराळ संशोधनाच्या नव्या पर्वाची ही सुरुवात असून, पंतप्रधान मोदींनी आपल्या शेवटच्या शब्दांत म्हटलं “तुम्ही अंतराळात असलात, तरी प्रत्येक भारतीयाच्या हृदयात आहात.” हा संवाद आणि शुक्ला यांचे योगदान अनेक भारतीयांसाठी प्रेरणादायी ठरणार आहे.
कोणत्याही टिप्पण्‍या नाहीत
टिप्पणी पोस्ट करा