जिजाऊ ज्ञान मंदीरचे स्नेहसंमेलन उत्साहात संपन्न !

जिजाऊ ज्ञान मंदीरचे स्नेहसंमेलन उत्साहात !

(इस्लामपूर)

        जिजाऊ ज्ञान मंदीर प्रि- प्रायमरी स्कूल बहे, इस्लामपूर यांचा संयुक्त वार्षिक स्नेहसंमेलन आयोजित करण्यात आला. यावेळी शिवमती सुवर्णा दिलीप पाटील यांना राजमाता जिजाऊ प्रेरणा पुरस्काराने सन्मानित करण्यात आले. आदर्श समाज घडविण्यासाठी चांगल्या पुरोगामी विचारांची गरज आहे असे या कार्यक्रमाचे अध्यक्ष साम्यवादी विचारवंत काॕम्रेड धनाजी गुरव यांनी प्रतिपादन केले.इतिहास अभ्यासक प्रा. सचिन गरुड म्हणाले की नवीन शैक्षणिक धोरणानुसार मुलांचे शिक्षण घेण्याचा अधिकार काढून घेतले आहेत आपण आपल्या मुलांच्या भविष्यासाठी एकत्र यावे लागेल.यावेळी प्रहार शिक्षक संघटनेचे चंद्रशेखर क्षिरसागर, दिलीप पाटील ,कापूसखेड गावचे सरपंच निवृर्ती माळी प्रमुख उपस्थिती म्हणून लाभले. दिपप्रज्वलन व जिजाऊ वंदनेने कार्यक्रमाची सुरूवात झाली. यावेळी २०२३-२४ या शैक्षणिक वर्षात घेण्यात आलेल्या माता-पालक तसेच आजी-आजोबा यांच्या वेशभूषा, चिञकला, संगीत खुर्ची , उखाणा या स्पर्धांचे बक्षीस वितरण करण्यात आले. अनुष्का चव्हाण, तनुष नलवडे, संस्कार शेळके या आदर्श विद्यार्थ्यांचा देखील सत्कार करण्यात आला. विद्यार्थ्यांनी जिजाऊ वंदना, स्वागत गीत , नृत्य , अंधश्रद्धा व विज्ञान तसेच अभंगगाथेचे महत्त्व यासारख्या विषयांवर नाटक, शिक्षण काळाची गरज तसेच पाण्याचे महत्त्व यासारख्या सामाजिक विषयांवर भाषणे, मोबाईल की पुस्तक यावर एकांकिका इत्यादी सादर केले. 

     यावेळी स्वागत परिचय व प्रास्तविक संस्थेचे संस्थापक उमेश शेवाळे , कार्यक्रमाचा आढावा सौ. आशा खाडे , सुञसंचलन तेजस्विनी शेवाळे व कु. संस्कार शेळके, आभार सौ. मेघा लाड यांनी केले. रोहित तोरस्कर, दत्ताञय नलवडे, अमोल चव्हाण, कापूसखेडचे सरपंच निवृत्ती माळी यांनी मनोगत व्यक्त केले. यावेळी संभाजी ब्रिगेड शहराध्यक्ष अजित हवलदार, उपाध्यक्ष विशाल धस,रोहिणी आरबुने, प्रियंका शिंदे, पुजा थोरात, वैशाली यादव , ऋतुजा पोवार, आदि शिक्षक , विद्यार्थी व पालक वर्ग उपस्थित होता.

जोगेश्वरीत निनाद सांस्कृतिक महोस्तावला उत्स्फूर्त प्रतिसाद!

 

विशेष प्रतिनिधी

सतीश वाघ फाउंडेशन प्रायोजित आणि निर्धार-एक हात आपुलकीचा आयोजित निनाद सांस्कृतिक महोत्सव दि.१२, १३ आणि १४ जानेवारी २०२४ रोजी जोगेश्वरी पूर्व येथील अरविंद गंडभीर हायस्कूलच्या पटांगणात पार पडला. जोगेश्वरीतील सांस्कृतिक चळवळ पुनरुज्जीवित करण्याच्या उद्देशाने या महोत्सवाचे भव्य आयोजन करण्यात आले. या निनाद महोत्सवाला जोगेश्वरी तसेच आसपासच्या रसिकांनी उदंड प्रतिसाद दिला. या महोत्सवाचे उद्घाटन शुक्रवार दि.१२ जानेवारीला सतीश वाघ फाउंडेशन आणि सुप्रिया लाइफ सायन्सेस लिमिटेडचे सर्वेसर्वा आणि अरविंद गंडभीर शाळेचे माजी विद्यार्थी डॉ. सतीश वाघ यांच्या हस्ते झाले.

मान्यवरांच्या हस्ते दीपप्रज्वलन करण्यात आले. त्यानंतर सतीश वाघ फाउंडेशनच्या आणि निर्धार-एक हात आपुलकीचा या संस्थांच्या सामाजिक कार्यांची माहिती देणारी चित्रफीत दाखवण्यात आली. त्यानंतर प्रख्यात संगीत संयोजक कमलेश भडकमकर यांच्या संचाकडून "गाणी मनातली" मराठी सुमधुर गाण्यांची बहारदार मैफल सजवण्यात आली. यात सुप्रसिद्ध गायक ह्रिषिकेश रानडे, चैतन्य कुलकर्णी तसेच गायिका मधुरा कुंभार, केतकी भावे-जोशी यांनी अनेक जुनी-नवी गाणी सादर केली. मयुरेश साने या हरहुन्नरी कलाकाराने या कार्यक्रमाच्या सुत्रसंचालनाची भूमिका उत्तमरीत्या पार पाडली. तसेच, निलेश परब ढोलकीवर, आर्चीस लेले तबल्यावर आणि विजू तांबे यांनी बासरीवर नेहमीप्रमाणे आपली जादू दाखवली. जमलेल्या सर्व रसिक प्रेक्षकांनी या संगीत मैफिलीचा मनमुराद आस्वाद घेतला.

निनाद सांस्कृतिक महोत्सवाच्या दुसऱ्या दिवशी शनिवार दि.१३ जानेवारी रोजी सध्या रंगभूमीवर गाजत असलेल्या "आमने-सामने" या मराठी नाटकाचा प्रयोग झाला. या नाटकातील प्रमुख भूमिका करणारे कलाकार लीना भागवत, मंगेश कदम आणि इतर कलाकारांनी एक वेगळाच आणि सध्याच्या तरुण पिढीला साद घालणारा विषय प्रेक्षकांसमोर आपल्या नाटकातून मांडला आणि प्रेक्षकांची मने जिंकली.

निनाद महोत्सवाच्या समारोपाच्या दिवशी म्हणजेच रविवार दि.१४ जानेवारी रोजी सुप्रसिद्ध दिग्दर्शक आणि कलाकार संतोष पवार लिखित आणि दिग्दर्शित एक हास्यप्रधान व्यावसायिक मराठी नाटक "यदा कदाचित रिटर्न्स" चा प्रयोग आयोजित करण्यात आला. या तुफान विनोदी आणि संगीतमय नाटकाने तर प्रेक्षकांमध्ये धम्माल उडवून दिली. पूर्ण प्रयोगादरम्यान प्रेक्षकांमध्ये तुफान हशा पिकत होता.

निनाद सांस्कृतिक महोत्सवाच्या समारोपाच्या दिवशी सतीश वाघ फाउंडेशनचे सर्वेसर्वा डॉ. सतीश वाघ यांना निर्धार तर्फे शुभेच्छापत्र देऊन मनःपूर्वक आभार मानण्यात आले.

अशा तऱ्हेने सतीश वाघ फाउंडेशन आणि निर्धार- एक हात आपुलकीचा आयोजित निनाद सांस्कृतिक महोत्सव रसिक प्रेक्षकांच्या उत्साहात आणि जल्लोषात साजरा केला गेला. या महोत्सवासाठी सतीश वाघ फाउंडेशनतर्फे सढळ हस्ते मदत करण्यात आली तसेच अरविंद गंडभीर हायस्कूलच्या व्यवस्थापकांनी त्यांच्या शाळेचे पटांगण उपलब्ध करून देऊन निर्धारला मोलाची मदत केली. प्रेक्षकांनीही असा सांस्कृतिक महोत्सव जोगेश्वरी येथे दरवर्षी आयोजित केला जावा अशी विनंती निर्धारच्या सदस्यांकडे केली.

रायगड कारखान्याला आग: आठ मृतदेह बाहेर, तीन अद्याप बेपत्ता, शोधमोहीम सुरूच...

रायगड कारखान्याला आग: आठ मृतदेह बाहेर, तीन अद्याप बेपत्ता, शोधमोहीम सुरूच...

रोहन दसवडकर

एका दिवसापूर्वी महाराष्ट्रातील रायगड जिल्ह्यातील एका फार्मास्युटिकल कंपनीला लागलेल्या आगीनंतर शनिवारी दुसऱ्या दिवशी शोध मोहीम सुरू असताना आठ मृतदेह सापडले, असे एका अधिकाऱ्याने सांगितले. तीन जण अद्याप बेपत्ता आहेत.

येथून सुमारे 170 किलोमीटर अंतरावर असलेल्या रायगड जिल्ह्यातील एमआयडीसी महाडमधील ब्लू जेट हेल्थकेअरमध्ये शुक्रवारी सकाळी 11 वाजता आग लागली, असे राष्ट्रीय आपत्ती प्रतिसाद दलाच्या अधिकाऱ्याने सांगितले.

सकाळी 7 वाजेपर्यंत चार मृतदेह सापडले होते, तर संध्याकाळी 5 वाजेपर्यंत आणखी चार मृतदेह बाहेर काढण्यात आले होते. आग लागल्यानंतर बेपत्ता झालेल्या 11 जणांपैकी हे लोक आहेत. उर्वरित तिघांसाठी स्थानिक एजन्सी तसेच एनडीआरएफच्या जवानांची शोध मोहीम सुरू आहे," तो म्हणाला. प्राथमिक तपासानुसार, शॉर्ट सर्किटमुळे आग लागली असावी, ज्यामुळे साइटवर रसायनांनी भरलेल्या बॅरल्सचा स्फोट झाला, ज्यामुळे आग आणखी तीव्र झाली, असे अधिकाऱ्याने सांगितले.