मुंबई: शाहरुख खानच्या 'जवान' चित्रपटाची क्रेझ सर्वत्र पाहायला मिळते आहे. शाहरुखच्या चाहत्यांसाठी हा सिनेमा आता नुसता चित्रपट राहिला नसून एक सोहळा बनला आहे. चित्रपटगृहांमध्ये चाहत्यांची मोठी गर्दी पाहायला मिळत असून एटली यांच्या दिग्दर्शनाखाली बनलेल्या या चित्रपटाने अवघ्या ६ दिवसांत ६२० कोटींची कमाई केली आहे. दरम्यान कलेक्शनच्या पलीकडेही या सिनेमाबद्दल सोशल मीडियावर बोलले जात आहे. 'जवान २', याचे कथानक, संवाद याबद्दल चर्चा होते आहे. शिवाय सध्या एका चर्चेने जोर धरला आहे की सिनेमातील बरेच सीन कॉपी आहेत. प्रसिद्ध स्पॅनिश वेब सीरिज 'मनी हाइस्ट' आणि 'जवान' यांचा संबंध जोडला जातो आहे. या शोमधून शाहरुखच्या चित्रपटातील अनेक सीन्स कॉपी केल्याचा दावा केला जात आहे.