ठाणे - कल्याण लोकसभा मतदारसंघातील विकासकामांना गती मिळत असून, दिवा शहरातील आगासन रोड परिसरात छत्रपती शिवाजी महाराजांचा भव्य अश्वारूढ पुतळा उभारण्यात येणार आहे. या कामासाठी राज्याच्या नगर विकास विभागाकडून तब्बल ४ कोटी रुपयांचा निधी मंजूर झाला होता. खासदार डॉ. श्रीकांत एकनाथ शिंदे यांच्या सातत्यपूर्ण पाठपुराव्यामुळे हा महत्त्वपूर्ण निधी उपलब्ध झाला आहे. यासाठी शिवसेना नगरसेवक रमाकांत मढवी यांनी देखील पाठपुरावा केला होता. या सातत्यपूर्ण पाठपुराव्याला यश आले असून पुतळा उभारण्याच्या प्रत्यक्ष कामासाठीची २ कोटी रुपयांची निविदा जाहीर झाली आहे. यामुळे येत्या १ मे रोजी आगासन येथे या पुतळ्याच्या प्रत्यक्ष उभारणीचा भूमिपूजन सोहळा पार पडणार आहे.
दिवा शहरात ही छत्रपती शिवाजी महाराजांचा एक भव्य पुतळा असावा अशी मागणी स्थानिक नागरिक आणि शिवसैनिकांकडून केली जात होती. तर यासाठी शिवसेना नगरसेवक रमाकांत मढवी यांनी ही खासदार डॉ. श्रीकांत शिंदे यांच्याकडे याबाबत मागणी केली होती. यासर्वांच्या मागणीला खासदार डॉ. श्रीकांत शिंदे यांनी सकारात्मक प्रतिसाद दिला. आणि उपमुख्यमंत्री एकनाथ शिंदे यांच्या अखत्यारीत असलेल्या राज्याच्या नगरविकास विभागाकडे पुतळा उभारणीसाठीच्या निधीची मागणी केली. या मागणीला उपमुख्यमंत्री एकनाथ शिंदे यांनी प्रतिसाद देत ४ कोटी रुपयांचा निधी मंजूर केला. तर आता राज्याच्या नगरविकास विभागाकडून तब्बल २ कोटी रुपयांची निविदा काढण्यात आली आहे. खासदार डॉ. श्रीकांत एकनाथ शिंदे यांच्या सातत्यपूर्ण पाठपुराव्यामुळे हा महत्त्वपूर्ण निधी उपलब्ध झाला आहे. येत्या १ मे रोजी आगसन येथे या पुतळ्याच्या प्रत्यक्ष उभारणीचे काम सुरु होणार असल्याची माहिती शिवसेना नगरसेवक रमाकांत मढवी यांनी दिली आहे.
छत्रपती शिवाजी महाराजांचा अश्वारूढ पुतळा हा सांस्कृतिक अभिमानाच्या प्रतिका समवेतच स्थानिक नागरिकांमध्ये प्रेरणादायी संदेश देणारा ठरेल. तर आगासन रोड परिसरातील या महाराजांच्या अश्वारूढ पुतळ्यामुळे दिवा शहराचे सांस्कृतिक आणि ऐतिहासिक महत्त्व अधिक वाढेल, असा विश्वास व्यक्त होत आहे. खासदार डॉ. श्रीकांत शिंदे यांनी यापूर्वी मतदारसंघातील अनेक विकास प्रकल्पांसाठी निधी मिळवून दिला असून, नागरिकांच्या प्रलंबित मागण्या पूर्ण करण्यासाठी त्यांचा सतत प्रयत्न सुरू आहे.
कोणत्याही टिप्पण्या नाहीत
टिप्पणी पोस्ट करा