डोंबिवली : ठाणे जिल्ह्यातील खेळाडूंना विविध खेळांमध्ये आपली कला व प्रतिभा दाखवता यावी यासाठी मुख्यमंत्री एकनाथ शिंदे यांच्या मार्गदर्शनाखाली आणि कल्याण लोकसभा मतदारसंघाचे संसदरत्न तसेच लोकप्रिय खासदार डॉ. श्रीकांत एकनाथ शिंदे यांच्या वाढदिवशी त्यांच्या पुढाकाराने आयोजित 'खासदार क्रिडासंग्राम' स्पर्धेला रविवारी साधेपणाने सुरवात झाली. शिवसेनेचे कल्याण शहर प्रमुख महेश गायकवाड यांच्यावर झालेल्या गोळीबार हल्ल्यामुळे या स्पर्धेचा अत्यंत साधेपणाने उद्घाटन सोहळा संपन्न झाला. यावेळी स्पर्धेच्या ट्रॉफीचेही मान्यवर व्यक्तींच्या उपस्थितीत अनावरण करण्यात आले.
या स्पर्धेचे सुरुवात कुस्तीने करण्यात आली. प्रसिद्ध महाराष्ट्र केसरी कुस्तीपटू सिकंदर शेख आणि दिल्लीतील पंजाब केसरी छोटा गणीसोबत या स्पर्धेतील पहिला आणि प्रेक्षणीय सामना खेळविण्यात आला. ज्यामध्ये अवघ्या काही मिनिटांत महाराष्ट्राच्या सिकंदरने छोटा गनीला लोळवत धूळ चारली. आणि प्रेक्षणीय सामन्यात विजयी सलामी दिली. तर त्यापाठोपाठ महाराष्ट्राची कुस्तीपटू उपमहाराष्ट्र केसरी वैष्णवी पाटील आणि शिवांजली शिंदे यांच्यामध्ये महिलांचा सामना खेळवला गेला. ज्यामध्ये अंबरनाथ तालुक्यातील मंगरूळच्या वैष्णवी पाटीलनेही साताऱ्याच्या शिवांजलीला काही मिनिटांतच लोळविले आणि विजयी पताका फडकवली. दरम्यान कुस्तीच्या सामन्यानंतर यावेळी उपस्थित मान्यवर मंडळींच्या उपस्थितीत कबड्डी, खो-खो आदी स्पर्धांनाही यावेळी प्रारंभ करण्यात आला.
कल्याण लोकसभेचे लाडके संसदरत्न खासदार डॉ.शिकांत शिंदे यांच्या माध्यमातून ह.भ. प. संत सावळाराम महाराज क्रिडा संकुलात खेळवण्यात येणाऱ्या क्रिडा संग्रामात एकूण १६ खेळांचा समावेश करण्यात आला आहे. ठाणे जिल्ह्यातुन ४७,००० क्रीडा खेळाडू यांनी या क्रीडासंग्रामात सहभाग घेतला असून त्यापैकी ११ क्रिडा स्पर्धा डोंबिवली एमआयडीसीतील ह.भ.प. संत सावळाराम महाराज क्रिडा संकुलात खेळवल्या जाणार आहेत असे डोंबिवली शहरप्रमुख राजेश मोरे यांनी प्रसिद्धी माध्यमांना सांगितले. तसेच खासदार क्रीडासंग्राम कार्यक्रमाचे सूत्रसंचालन कलाकार प्रणव भांबुरे यांनी केले.
कोणत्याही टिप्पण्‍या नाहीत
टिप्पणी पोस्ट करा