डोंबिवली दि.२३: डोंबिवली एमआयडीसी फेज दोन मधील 'अमुदान केमिकल कंपनी'मध्ये बॉयलरचा स्फोट होऊन आत्तापर्यंत आठ कामगार ठार झालेत. यामध्ये अजून किमान ६५ कामगार जखमी झाल्याची प्राथमिक घटना उघडकीस आली आहे. डोंबिवली अग्निशामक दलाचे बंब घटनास्थळी दाखल झाले असून आग विझविण्याचे काम अग्निशामक दलाकडून शर्थीने सुरू आहे.
केमिकल कंपनीत आग
डोंबिवली एमआयडीसीत 'अमुदान केमिकल कंपनी' बॉयलरचा मध्ये मोठा स्फोट झाल्याची धक्कादायक घटना घडली असून स्फोटानंतर कंपनीत भीषण आग लागली. यात ८ जण ठार झालेत. तर स्फोटात ६५ कामगार जखमी झाल्याची प्राथमिक माहिती मिळत आहे. आगीनंतर धुराचे लोट दूरवरुनही पाहायला मिळत होते. परिसरातील इमारतींच्या काचाही फुटल्याची माहिती आहे. या घटनेमुळं डोंबिवली भागात खळबळ उडाली असून भीतीचं वातावरण पसरले आहे. डोंबिवली अग्निशामक दलाचे ८ बंब घटनास्थळी दाखल झाले.
अग्निशमन दलाचे जवान घटनास्थळी दाखल
या स्फोटामुळं अनेक वाहनांचे आणि घरांचे नुकसान झाले आहे. तर घटनास्थळी आगीवरती नियंत्रण मिळवीण्याचे शर्थीचे प्रयत्न सुरू आहेत. एमआयडीसी अग्निशमन दलाचे जवान सात फायर वाहनासह उपस्थित आहेत. तसेच डोंबिवली अग्निशमन दलाचे जवान फायर वाहनासह उपस्थित आहेत तसेच कल्याण (पु) अग्निशमन दलाचे जवान फायर वाहनासह उपस्थित आहेत. कल्याण (प) अग्निशमन दलाचे जवान दोन फायर वाहनासह उपस्थित आहेत. पलावा एमआयडीसी अग्निशमन दलाचे जवान फायर वाहनासह उपस्थित आहेत. ठाणे अग्निशमन दलाचे जवान हायराईज फायर वाहनासह उपस्थित आहेत.
डोंबिवलीत पुन्हा 'प्रोबेस'ची पुनरावृत्ती
दिनांक १६ मे २०१६ रोजी डोंबिवलीत प्रोबेस कंपनीत बॉयलरचा स्फोट होऊन १२ जणांचा मृत्यू झाला होता. तर दोनशेच्या वर नागरिक जखमी झाले होते. नागरिकांच्या करोडो रुपयांचे मालमत्तेचे नुकसान झाले होते. आज तिच पुनरावृत्ती डोंबिवली एमआयडीसी फेज दोन मधील 'अमुदान केमिकल्स' मध्ये स्फोट होवून झाली आहे. त्यावेळी प्रोबेस स्फोटाची चौकशी समिती नेमली होती. तो अहवाल जनतेसमोर आणण्यात आलाच नाही आणि त्यातील सूचनांची अंमलबजावणी करण्यात आली नाही. आता पुन्हा तेच तेच चौकशा समित्या नेमणार हे नक्की. प्रोबेस स्फोटातील नुकसान झालेल्या मालमत्ता धारकांना आणि काही जखमी होऊन जायबंदी झाले होते त्यांनाही अद्याप नुकसान भरपाई मिळाली नाही असे प्रसिद्धी माध्यमांना सांगण्यात आले.
डोंबिवली एमआयडीसीतील 'अमुदान केमिकल कंपनी'मध्ये मोठा स्फोट झाला. या संदर्भात जिल्हाधिकाऱ्यांशी बोलणं झालेलं आहे. घटनास्थळी रेस्क्यू टीम , जिल्हाधिकारी, खासदार तिथे पोहोचले आहेत. त्या ठिकाणी सर्व परिस्थिती कंट्रोलमध्ये आहे. असे मुख्यमंत्री एकनाथ शिंदे यांनी मीडिया ला सांगितले.
नागरिकांचा सुरक्षेचा प्रश्न ऐरणीवर
आज झालेल्या स्फोटाने अनेक इमारतींचं नुकसान झालं आहे. इमारतींना स्फोटाचा वेळी मोठे हादरे बसले. एमआयडीसी फेज मधील म्हात्रे पाडा, रिजेंसी इस्टेट, एमआयडीसी निवासी विभाग, सोनार पाडा इत्यादी भागात मालमत्तेचे नुकसान झाले आहे. सदर भागात काही लोखंडी भागांचे अवशेष पडल्याचं दिसत आहे. स्फोट झालेल्या परिसरातील नागरिक भयभयीत झाले असून अशी दुर्घटना होत असल्यानं नागरिकांचा सुरक्षेचा प्रश्न निर्माण झाला आहे. एमआयडीसी मधील अती धोकादायक कंपन्या त्वरित येथून हलविण्यात याव्यात, अशी येथील जनतेची सरकारकडे मागणी आहे. आता या स्फोटामुळं एकूण किती जखमी, मृत्यू झाले याची माहिती अद्याप मिळाली नाही पण नागरिकांच्या मालमत्तेचे मोठे नुकसानहानी झाल्याचं प्राथमिक पाहणीत दिसत आहे.
डोंबिवली एमआयडीसीतील 'अमुदान केमिकल कंपनी' येथे बॉयलरचा स्फोट झाल्याची घटना दु:खद आहे. ८ जण या घटनेत मृत्युमुखी पडले असून ६५ जखमींच्या उपचाराची व्यवस्था करण्यात आली असून आणखी रुग्णवाहिका सज्ज ठेवण्यात आल्या आहेत. जिल्हाधिकाऱ्यांशी माझी चर्चा झाली असून, तेही घटनास्थळी पोहोचत आहेत. एनडीआरएफ, टीडीआरएफ, अग्निशमन दलाला पाचारण करण्यात आले आहे. जखमींच्या प्रकृतीत लवकर सुधारणा व्हावी, अशी मी ईश्वरचरणी प्रार्थना करतो असे उपमुख्यमंत्री देवेंद्र फडणवीस म्हणाले.
स्फोटाचा हादरा दीड किलोमीटर पर्यंत बसला
'अमुदान केमिकल कंपनी'मध्ये दुपारी पावणे दोन च्या सुमारास स्फोट झाला. स्फोट झाल्यानंतर जवळच्या कंपन्यांनाही आग लागल्याचं समोर आलं. हा स्फोट इतका भीषण आणि भयावह होता की हवेत आगीच्या धुराचे लोळ दिसत होते. आजूबाजूलाही काही दिसत नव्हतं. या स्फोटामुळं दीड किलोमीटर परिसर हादरुन गेला, दीड किलोमीटरमधील गाड्यांच्या आणि बिल्डिंगच्या काचा फुटल्या आहेत. लोक भूकंप आला असल्याप्रमाणे सैरावैरा पळत होते. आजुबाजूच्या परिसरातील एकाही सोसायटीच्या काचा राहिलेल्या नाहीत, सगळ्या काचा तुटून गेल्या आहेत. स्फोटात बॉयलर्सचे जे तुकडे उडाले ते दीड किलोमीटर अंतरावर पडले. हे तुकडे चारचाकी गाड्यांवर पडून गाड्या दबल्या आहेत, अशी माहिती स्थानिक रहिवाशी यांनी प्रसिद्धी माध्यमांना दिली.
जवळच्या तीन कंपन्यांनाही लागली आग
'अमुदान केमिकल कंपनी'च्या बॉयलरच्या स्फोटाचा आवाज सभोवतालच्या ३ किलोमीटर परिसरापर्यंत ऐकू आला. बॉयलर्सचे तुकडे दीड किलोमीटर अंतरावर पडले आहेत, सगळ्या सोसायट्यांमधील इमारतींच्या काचा फुटल्या आहेत, अशी माहिती स्थानिकांनी दिली. इतकेच नाही तर स्फोटानंतर ही आग जवळच्या तीन कंपन्यांपर्यंत पसरली आहे. या घटनेतील जखमींवर डोंबिवलीच्या 'एम्स' रुग्णालयात उपचार सुरु आहेत. अग्निशमन दलाच्या सहा ते सात गाड्या घटनास्थळी पोहोचल्या आहेत.
लहान स्फोट सुरूच
डोंबिवली एमआयडीसीतील कंपनीच्या परिसरात धुराचे लोट आणि आगीची तीव्रता इतकी जास्त आहे की, अग्निशमन दलाच्या जवानांना कंपनीच्या गेटवरुनच पाण्याचा मारा करावा लागत आहे. कंपनीत अजूनही रसायनांचे अनेक ड्रम्स आहेत. आगीमुळे या ड्रमचा स्फोट होत आहे. त्यामुळे आग कमी होताना दिसत नाही. आगीची धग कमी झाल्याशिवाय अग्निशमन दलाला आतमध्ये शिरता येणे शक्य नाही असे एकंदरीत घटनेचे चित्र आहे.
कोणत्याही टिप्पण्‍या नाहीत
टिप्पणी पोस्ट करा