डोंबिवली दि.२६ : महाराष्ट्र राज्याचे बांधकाम मंत्री नामदार रविंद्र चव्हाण यांच्या माध्यमातून, 'डोंबिवलीकर एक सांस्कृतिक परिवार' आणि 'कल्याण-डोंबिवली रनर ग्रुप' यांच्या संयुक्त विद्यमाने डोंबिवलीकरांसाठी आरोग्य आणि मैत्री दिनाची सांगड घालत ४ ऑगस्ट २०२४ रोजी कल्याण डोंबिवलीमधील सर्वात मोठ्या "डोंबिवलीकर फ्रेंडशिप रन २०२४" चे आयोजन केले गेले आहे. चालणे, धावणे किंवा पळणे आरोग्यदायी जीवनाची गुरुकिल्ली आहे. धकाधकीच्या शहरी वातावरणात आपल्या शरीराला व्यायाम अत्यावश्यक आहेच असं आरोग्यविज्ञान सांगते आणि त्यासाठी चालणे, धावणे किंवा पळणे यापेक्षा उत्तम काहीच नाही आणि हाच मूलमंत्र रुजवण्यासाठी नामदार रविंद्र चव्हाण यांनी पुढाकार घेतला आहे.
"डोंबिवलीकर फ्रेंडशिप रन २०२४" ही स्पर्धा २१ कि.मी, १० कि.मी, ५ कि.मी आणि १.६ कि.मी. चा 'फन रन' (fun run) या टप्प्यांत आयोजित होणार आहे. १.६ कि.मी चा 'फन रन' हे या कार्यक्रमाचं आकर्षण असणार आहे जेथे ६ वर्षापासून ते वृद्धांपर्यत सर्वांचा सहभाग असेल. नामदार रविंद्र चव्हाण आणि कल्याण-डोंबिवली रनर ग्रुप तर्फे शाळा, कॉलेज, सामाजिक संस्था इत्यादींनी जास्तीत जास्त संख्येने सहभागी व्हावे असे आवाहन आज 'हॉटेल लिजंड' येथे झालेल्या पत्रकार परिषदेत करण्यात आले.
या मध्ये सहभाग घेतलेल्या प्रत्येक नागरिकांसाठी हा एक अविस्मरणीय अनुभव ठरावा यासाठी कल्याण-डोंबिवली रनर ग्रुप प्रयत्नशील आहे. कल्याण-डोंबिवली रनर ग्रुप ५०० मॅरॅथॉनर्स असलेली संस्था गेली ९ वर्ष डोंबिवली-कल्याण मध्ये धावण्याची संस्कृती रुजावी आणि वाढीस लागावी यासाठी प्रेरणादायी कार्य करत आहे. डोंबिवली हे संस्कृतीक शहर तर आहेच पण या शहरातील जास्तीत जास्त नागरिकांना तंदुरुस्त बनविण्यासाठी असे उपक्रम आवश्यक असल्याचे मत नामदार रविंद्र चव्हाण यांनी येथे बोलताना व्यक्त केले. 'दिवाळी पहाट' आणि 'गुढी पाडवा नववर्ष स्वागत यात्रा' यांसारख्या आकर्षक कार्यक्रमांसाठी ओळखले जाणारे हे सांस्कृतिक शहर आता 'डोंबिवलीकर फ्रेंडशिप रन'च्या माध्यमातून पण ओळखले जावे यासाठी हा प्रयास आहे. ज्यामुळे डोंबिवली हे फिटनेस उपक्रमांचे केंद्र बनेल याची आम्ही आशा बाळगून आहोत, असे नामदार चव्हाण यांनी नमूद केले.
'डोंबिवलीकर फ्रेंडशिप रन' मधील सहभागींना नामदार रविंद्र चव्हाण आणि सेलिब्रेटी रनर्स भेटण्याची आणि त्यांच्यासोबत धावण्याची संधी मिळणार आहे. हा कार्यक्रम फक्त स्पर्धा नसून आरोग्य आणि मैत्रीचा उत्सव असणार आहे. सहभाग घेणाऱ्या प्रत्येकाला ई-प्रमाणपत्र आणि सहभाग पदक मिळणार आहे असे प्रसिद्धी माध्यमांना सांगण्यात आले.
'डोंबिवलीकर फ्रेंडशिप रन' ची वर्गवारी
५ कि.मी
ही धाव अशा उत्साही लोकांसाठी आहे ज्यांनी नुकताच धावण्याचा प्रवास सुरु केला आहे आणि त्यांना भविष्यात १० कि.मी आणि २१ कि.मी सारख्या शर्यतींमध्ये दीर्घकाळापर्यंत प्रगती करायची आहे. त्या सर्वाना शर्यत पूर्ण झाल्यावर पदक आणि ई-प्रमाणपत्र मिळतील.
१० कि.मी आणि २१ कि.मी
या दोन श्रेणी कालबध्द शर्यती (टाईम्ड रेसिस) आयोजित केल्या आहेत आणि भारतातील सर्व प्रमुख धावण्याच्या इव्हेंटसाठी पात्रता म्हणून प्रमाणित केल्या जातील. अंतर पूर्ण करणाऱ्या सर्व नोंदणीकृत सहभागींना स्पर्धा पूर्णत्वाचे ई-प्रमाणपत्र आणि पदक मिळणार असल्याची माहिती आयोजकांनी दिली.
फन रन धाव १ मैल (१.६ km)
रनिंग इव्हेंटचा आनंद घेण्यासाठी आणि अनुभव घेण्यासाठी कुटुंब आणि मित्रांसह ही मजेदार रन असेल आणि पूर्ण झाल्यानंतर त्यांना सहभाग ई-सर्टिफिकेट मिळेल.
रजिस्ट्रेशन शुल्क
२१ कि.मी - ₹ ११९९/-
१० कि.मी - ₹ ९९९/-
०५ कि.मी - ₹ ५९९/-
फन रन १.०६ कि.मी करिता ₹ ९९/- रजिस्ट्रेशन शुल्क ऑनलाईन पद्धतीने आकारले जाईल असे आयोजकांनी प्रसार माध्यमांना सांगितले.
कोणत्याही टिप्पण्‍या नाहीत
टिप्पणी पोस्ट करा