दिनांक 09 सप्टेंबर, 2024 रोजी जोगेश्वरी पश्चिम येथील आदर्श नगर येथे वाढदिवसाच्या कार्यक्रमात, लहान मुलांना वाटण्यात आलेल्या बिग किड्स ऑरेंज ज्यूसच्या बाटलीत एक डास आढळून आला. पत्रकार संदीप कसालकर यांची मुलगी वैष्णवी हिला ज्यूसच्या बाटलीत काहीतरी असामान्य गोष्ट दिसली. जवळून पाहणी केल्यावर तिच्या लक्षात आले की यात डास आहे.
ही दूषित ज्यूसची बाटली ओशिवरा मेट्रो स्टेशनजवळील एका दुकानातून खरेदी करण्यात आली होती. संदीप कसालकर यांनी दुकानदाराशी संपर्क साधला असता, त्यांना माहिती मिळाली की या बाटल्या Aje India Pvt Ltd चे वितरक शैलेश मिश्रा यांनी पुरवल्या होत्या. मात्र, मिश्रा यांना स्पष्टीकरण विचारले असता त्यांनी उत्तर देण्यास नकार देत अचानक फोन कट केला.
कसालकर यांनी तात्काळ या घटनेची माहिती ओशिवरा पोलीस ठाण्याचे वरिष्ठ पोलीस निरीक्षक मोहन पाटील यांना दिली, त्यांनी त्यांना अन्न व औषध प्रशासनाकडे (एफडीए) तक्रार करण्याचा सल्ला दिला. या मार्गदर्शनानंतर कसालकर यांनी अंधेरी येथील एफडीएचे डॉ. सचिन जाधव यांच्याशी संपर्क साधला, त्यांनी धक्कादायक उत्तर दिले, “आम्ही याबाबत काहीही करू शकत नाही. तुम्हाला FSSAI पोर्टलवर तक्रार दाखल करावी लागेल.”
बालकांना विषबाधा झाल्याची प्रकरणे अजूनही ताजी असताना, हा निष्काळजीपणा आणि कारवाईत होणारा दिरंगाई गंभीर चिंता निर्माण करत आहे. हे प्रकरण निकडीचे असूनही संबंधित अधिकाऱ्यांकडून जबाबदारी व वेळीच प्रतिसादाचा अभाव दिसून येत आहे.
पत्रकार संदीप कसालकर यांनी आपला संताप व्यक्त करताना सांगितले की, “आमच्या मुलांच्या सुरक्षेचा प्रश्न येतो तेव्हा विलंबाला जागा असू शकत नाही. अशा घटना जीवघेण्या होऊ नयेत यासाठी अधिकाऱ्यांनी ताबडतोब कारवाई करण्याची गरज आहे.”
आता Aje India Pvt Ltd आणि जबाबदार वितरकांची उत्तरं काय असणार हे पाहणं आता औत्सुक्याचं ठरणार आहे. लहान मुलांच्या शीतपेयांमध्ये सुरक्षा मानकांचे असे धोकादायक उल्लंघन कसे होऊ शकते? आरोग्याच्या या गंभीर धोक्याकडे लक्ष देण्यासाठी त्वरीत कारवाई का केली जात नाही? असे अनेक प्रश्न सध्या सदर घटना पाहून उपस्थित राहत आहेत.
कोणत्याही टिप्पण्‍या नाहीत
टिप्पणी पोस्ट करा